防水膠布藍藥水

凌晨五點幾收到一個電話，

天都未光就要解決人事糾紛，

訓左三個鐘未夠就俾人嘈醒本身真係火火地滾，

但一聽電話發現事態嚴重醒水唔出聲。



女人最恐怖唔係喊到六月飛霜，

如果你女朋友喊到想殺左你多數都係玩下野好快無事，

最得人驚係異常冷靜平時明明好唔正常但突然變到好似好理智咁，

成個意識形態就好似TVB啲變態殺手殺完人過左個情緒高峰後，

覺得世界已經完左絕左望無得輸然後好冷靜咁諗點燒屍，

還掂都做左囉而家執返手尾姐有咩好怕。



你可以話係個女仔選擇性delete左某一段記憶逃避一切發生過既事，

唔想解決，

咪逃避囉，

去到咁既階段個女仔都已經自編自導自演判左你死刑，

女仔最恐怖真係自己決定左啲野而你唔知佢決定左啲咩，

十之有九都凶多吉少。



朋友上到黎粒聲唔出上床就訓左，

諗返起前日上到黎嘈到我想毒啞佢，

無啦，

佢決定左逃避，

一段感情中一旦有一方要逃避，

無得救，

玩完。



偷偷地去廚房打電話，

雖然我覺得好殘忍，

但無可避免地叫佢有定心理準備，

無計我隔幾個身位都feel到佢...個ex心如止水。



又由於佢都係人馬座，

如果仲鍾意佢可以隔幾個鐘send個msg俾佢，

但唔好期望佢會覆，

而佢呢兩個星期會發哂狂咁勁出去蒲，

人馬座特色內裡愈失落外在愈快樂，

你除左關心佢之外，

俾啲耐性唔好管佢，

但如果你一放棄，

就唔好諗住佢會返黎。



實情又係人馬係人獸混合體，

鍾意自由又擺脫唔到自己其實係一個人食草不能夠維生，

就好似個人永遠想離開個馬身又或者隻馬好想離開個人，

我地好鍾意試圖擺脫一啲永遠擺脫唔到既野，

只要你好明確咁話佢知你仲存在係佢生命入面，

佢玩完見攰，

就會彩返你。



－



早排同四個水瓶座朋友high tea，

佢地話水瓶座又係明明好地地隔幾個禮拜就想逃避下玩下野，

但唔同係人馬座感情比較外向鍾意show出黎，

佢地比較內向鍾意收埋係心，

人馬永遠拎住支箭亂咁放火，

水瓶永遠將感情封好滴水不漏，

人馬比較粗心大意完全ignore人內心世界，

佢地就比較心意細密同冷靜，

難怪佢地四個成日好羨慕我咩都做左先算要去死就真係去死，

但有時我又好羨慕點解佢地sense到咁多細微野。



跟住兩個男仔話其實佢地好鍾意扭計跟住搏人去哄，

哈哈哈我諗起前男友成日扭計我仲會鬧返佢地轉頭，

嗱我發誓真係100%sense唔到男仔會扭計呢回事啊下，

人馬座有時就係見到啲轉彎抹角唔知你想點就火滾，

加上我男性好友滿天飛咁其實呷醋咪講囉又要我估，

朋友話痴線下下同你講就唔洗你哄啦白痴，

然後巨蟹座話佢見到男朋友扭計會母性大發，

另一個水瓶座話佢會好開心因為佢會覺得自己好重要，

哈哈，

我啊？

咁火滾嘛又急又唔明喎，

咪拉弓殺左人先囉。



－



前日有個人打黎，

佢問：其實有咩唔同？



hmm，

有時你遇到一個人會覺得好似搵到自己一直缺少既野，

又或者好似失而復得，

填補返一個空缺，

最後合成係一件完整既事，

你會覺得佢係你生命生活必須品。



而得到一樣自己生命中唔需要既野，

唔會驚失去，

只係覺得錦上添花，

無左唔會覺得可惜，

但擁有又唔係太實在。



就好似擦損左只係貼防水膠布唔用藍藥水咁囉，

用左藍藥水可以唔貼膠布，

雖然可以快啲好但好容易整親再流血，

貼膠布其實唔會快啲好只係防止再整親，

睇你鍾意治標定治本，

可以兩樣都用既，

但你好難會搵到防水膠布同藍藥水混合體囉，

世事無完美嘛。



你本身諗住買半打macaroon，

原本只係諗住食六個，

去到先發現有deal買六送二，

而維持生命只需要六個，

無多兩個我唔會死，

多兩個又好似無咩所謂，

但當你只係單獨食兩個多出黎既macaroon，

唔會夠維持生命，

就係....

差咁啲咁囉。