麥恩莉

話說前日同朋友位芳齡五歲既千金鬧交，事關佢堅持叫我sherry姨姨，而我非常堅定地叫佢死o靚妹。「死o靚妹！」「sherry姨姨！」「唔准叫我姨姨！」「唔俾叫我死o靚妹！」「死o靚妹！」「sherry姨姨！」雙方硬頸地互睥，其後一直針鋒相對，又如食飯時：「唔俾你食雞翼！」「唔俾你食魚！」「我係都要食魚！」「我係都要食雞翼！」.... 相信件事將會如TVB所有劇一樣，兩位名媛鬥到世界末日十二月二十一號。


又話說早排去澳門，結論只有what the fuck，同香港人去旅行真係無癮。首先個天氣非常令人煩躁先，痴線，十二月出汗，唔講以為自己係澳洲。然後唔知前世做錯啲咩香港人係都要趕頭趕命，好似遲一步豬肉乾杏仁餅會絕種。趕完一輪之後，（噢都好彩地去左睇titanic exhibition），諗住同啊媽舒舒服服去威尼斯人（終於），啊注意係威尼斯「人」，撻威尼斯個朵出黎簡直係侮辱。講真啊，中國再咁copy落去唔係辦法。當時啊媽講左句：「嘩都幾靚喎。」小妹眼角流露一絲殺意，然後佢話...都係俾下意見姐，條氣先順返少少。BTW其實諗住去shopping，事關佢聲稱一站式幾百間名店，名車配熊黛林，名店當然配老豆。行左半粒幾鐘：「唉好攰啊，不如搭三點船走。」我難掩驚訝神色望望電話，當時係一點半，心諗..其實都唔係心諗：「what the fuck，我個行程岩岩先開始。」咁當然過門都係客，飲恨地與手袋們passby，途中一直暗地裡話哎呀我都未行Balenciaga同Yves Saint Laurent，跟住盡力唔太黑面地返屋企囉。


與十年好友meet up，三條友互望感慨，廿一歲就中年發福又好似真係快左啲。難得有運氣十年仍然可以烏冬店論衣著品味八卦是非，真係幾生修到要好好珍惜。好朋友咪係陪你去買化妝品理得你去死係隔離討論情境題，影相由你只就自己角度完全忽略對方個樣，碗烏冬太重口味食到一半肯無條件同你交換囉。而最緊要係：Fd到你夠膽提出要換對方碗烏冬，唔識返十年八載，真係點夠膽開口。又講下Gossip Girl，真係俾我估中左邊個係Gossip Girl，講真，我基本上skip左兩個season只係睇最後一集大結局。上兩個season簡直係TVB式名媛望族，只係劉松仁無死完又死死完再返生，Blair同Serena好似無整容。啊又話時話，劉松仁大結局當日一言驚醒香港人，套劇只係得一個中心思想，就係：「我（劉松仁）係一個好迷人既男人。」Sex and the City重點係要睇Carrie將Mr. Big收歸私人用途，而Gossip Girl就只係要睇Blair同Chuck乖乖地結婚。當我見到佢地兩個結婚時，套劇發生咩事已經who fuckin' cares，主要目的已經達成，全劇終。啊，Chunk同Blair個仔好得意。



－

近日聽左幾千百萬無限次Khalil新碟《回到未來》，顧名思義曲風係《未來》延續篇，無可救藥地浪漫。個人loop得最多係《麥恩莉》同娃娃填詞既《關於愛的定義》，一直諗咩係麥恩莉，開頭以為好似《蘇麗珍》係電影角色，多番google解構密碼不果半放棄，但今日係Facebook見到一位台灣歌手林綾係status發表「麥恩莉要把冰融化了喔你」。直覺用國語讀....啊!!!!!


My Only.


麥恩莉。






－

紙鶴，

妳溫柔對摺，

如爵士樂般隨性的快樂。

Myself

話說近日介乎忙與悠閒之間，忙在於essay deadline，閒在於essay deadline前一日，仲夠膽死處變不驚成班人去shopping食飯。近日因為另一個Project拎兩條A，失心瘋買左好多唇膏。YSL oxblood red配MMM皮褸Gothic look，Chanel cherry red配聖誕樹綠。好似好癲，但我不嬲沒有最癲只有更癲，要稱得上真心癲，係琴日交完Essay後買左支Tom Ford Shocking Pink....未至於Shocking既，桃紅囉，都夠打低半條Bond Street架啦。重點係我夠膽用，你咪理我浮誇啊樣衰又好點都好，總之我夠膽用。我覺得一個人只要夠膽去做自己想做既野（唔危及生命、妨礙他人正常生活），真係唔需要理其他人點睇，都世界末日啦，咁聽話做咩，邊個得閒理你個咀螢光粉紅色。

廿一歲都係無咩進步，生活仍然非常Messy。交essay前一晚去行街食飯十一點幾返屋企，Proof Read做到兩點幾，然後Flatmate printer無墨，第二日明明話左十一點到Holborn，點知十一點先起身化個霸氣妝、拎個Balmain窩釘Clutch去交功課，等啊Flatmate印左成粒鐘Essay，一點交完走得，去Selfridges報仇買唇膏，去Liberty買朱古力，三點幾俾人的左返屋企，如果唔係其實仲想去Topshop買對鞋......返到屋企胡亂執行李，基本上係朋友執既.........五點鐘去機場， 七點鐘Check-in，八點上機，九點飛。好多人問我點解可以用同樣廿四小時做到咁多野，我都唔知，但我睇返以上段野都覺得頭痛。

上機睇Grace Coddington本Autobiography，偶像真係偶像，真係thank god有生之年竟然係學校見到佢，好記得當時臉紅心跳發發地燒。當初睇"The September Issue"時已經好明確了解佢同Anna Wintour與Andre Leon-Talley三者之間強烈對比與互補。Anna官方果斷bossy具權威性，Grace任性自我低調好勝唔怕死，Andre則Funny浮誇圓滑善於Social，基本上佢地三個拍埋一齊係最佳組合。時裝界位於主流軸心中部雜誌之中，個人覺得Elle UK、Vogue Italia比較好睇。Vogue Paris真係唔好提啦，自從閃電換走Editor-in-chief，小妹另一個偶像Carine Roitfeld之後，連封面都無再望過一眼，哀莫大於心死。（BTW真係熱烈期待佢自己出本CR Fashion-book）但任一本雜誌幾好睇都好，都係永遠唔會有雜誌打得低Vogue US，實在係道霸氣問題。資本主義世界基本上所有與商業掛勾都一定會有霸權，而我覺得霸權都需要backbone support，unbeatable並唔係單靠有錢就做得到。就如容祖兒，雖然我唔係佢fans，但佢用力做好自己本份的確係值得成為霸權，我唔會抵抗霸權，並且接受霸權存在，只不過係選擇比較鍾意睇i-D與何韻詩。


搭飛機途中其實係好攰好眼訓，但由於唔好彩坐係一排小童座後面，全程十三個鐘每一分鐘都有小朋友喊，結果都係認命睇下書睇下戲打發時間算。睇左一套諷刺美國政治宣傳既“The Campaign"，然後睇畫皮II。唔知點解覺得套戲好似自己細個曾經寫過一篇文，中三時我寫過一個女仔因為自己唔靚，示愛被拒絕，受魔鬼引誘，殺三個人用佢地既心臟換取美麗，最後接受唔到自己殺過人而自殺。而畫皮係講妖無心，要殺人取心維生，同時要引誘人自願交出心臟交換身份，用換取返黎既熾熱心臟轉化成人，感受溫暖、愛、恨、杜鵑花香。而人轉化成妖，要繼續殺人取心維生，或者找尋下一位自願者。


其實套戲唔係人地講到咁膚淺咁垃圾，唔好focus on特技啊造型抄抄襲襲啊之類之類先啦，真係好好諗下當中雖然低手地膚淺既愛情道理，真實愛情，其實又咪係咁膚淺、低手、庸俗。近幾年學識唔好美化與深化愛情，愛情本身，就係咁簡單、直接、邏輯犯駁、沉溺，幼稚。係話人地小學雞前，諗諗自己，其實，你都唔係好有深度。


最近發現梁一貞出碟，暗地裡wow左一聲，因為我電腦長期有一首滄海遺珠Mars戰神片尾曲“說愛我”，上一隻碟非常失望，而今次新碟中，“還是想你”非常出色。



還是想你：







說愛我：