半夜落七仔叮個肉醬意粉

話說Tim與Fiona去完一轉Florence後只係被人偷左兩部iPhone，

執返身彩返黎食慶功飯，

又開電腦睇春嬌與志明，

其實已經睇第三次差啲第四次，

當然今次我一路聽一路睇書未至於癲到又再睇。



有四五位朋友讚揚我好似余春嬌，

一路睇時一路情不自禁地諗起我，

當楊千嬅講收皮啦同你條仆街時真係形神俱備，

其中一位朋友回憶起我同佢講過：

“仆街仲企係度望電話，去人屋企樓下死纏爛打啦。”

而佢又真係因為我句仆街追返個女朋友返黎就結婚，

有時真係咁岩得咁橋想唔認都唔得。



其實所有人身邊都總有一個余春嬌brenda張志明，

而余春嬌係主角，

代表本人係好多人生命中屬於主角系列，

ok fine我接受，

我好樂意做你地心目中既余春嬌。



－



又話說琴晚去chinatown食叉燒燒鴨飯順手補倉，

朋友話原來我地附近有一間中國超級市場，

其實真係唔好俾我知係邊，

成日有得食就無左個深層意義，

去chinatown背後個意義係：

你老味食左半年垃圾蕃茄意粉，

係時候去食個黯然銷魂四寶飯。



然後特登滿心期待地去食一個燒味飯，

天堂體驗完一個鐘後，

再等下一次懷念。



－



岩岩係廚房煮魚旦雲吞河時，

flatemate問怎麼你們香港人這麼喜歡吃這種白色的魚丸啊好腥喔，

還有那個河粉，

沒有味道的啊。



雲吞魚旦河既精髓係背後個意識形態，

放復活假閒日無無聊聊同細佬訓到一點幾起身，

頭唔梳踢對新monday送既人字拖落街食碗魚旦粉，

其實九龍城間德昌魚旦粉真係唔知有咩咁好食，

個個禮拜六日都一班傻仔係門口到排成粒鐘隊，

老實講轉角位間茶記雙丸河先係溫馨感動之作，

講到尾都係香港人精神，

排完隊粒魚旦特別銷魂。



然後Flatmate望住我差唔多倒哂成支李錦記紅醋落碗雲吞魚旦河，

佢話：你們香港人啊還真咀刁，

吃什麼都要customize一番才肯放進咀裡，

看那些外國人啊給他們什麼就吃什麼唄，

你們啊又多蔥加醋走豆芽，

麻煩那。



我一直好欣賞香港地道飲食精神，

魚旦河重點唔係魚旦都唔係河粉，

而係唔同人如何去令碗食之無味棄之可惜既魚旦河有個性有靈魂，

換句話講，

做野唔洗做足100分，

香港人好叻凡事留一線俾個位你自由發揮與發展潛能，

當然同時香港人係有能力將一碗只係ok合格既魚旦河變成120分離哂譜既人間美食，

講真，

所有野都係平平無奇，

九成都係靠自己調味。



就好似張志明鍾意食七仔肉醬意粉，

肉醬基本上係水溝油意粉硬又無味，

同樣真係食背後個理念而唔係為飽，

“半夜落七仔叮個肉醬意粉”，

實情係凌晨自己一個落街散個步靜下件事好浪漫，

同碗野味道完全無關，

味道，

都只係一個記憶點。



除左呢個原因，

我都真係解釋唔到點解中一二時成日放學同朋友去七仔叮難食到嬲既燒賣魚旦，

落哂成支甜豉油都遮唔到燒賣陣膠味，

十朝有九朝都食魚肉燒賣做早餐，

我真係知食得多係會死架但我真係好想食，

有時又真係慣性地食費事用腦諗，

唔食都食左八朝，

食埋今朝無所謂啦。



當然仲有同邊個去，

行過去途中發生過咩事，

係七仔度hea一輪廢話，

認真真係廢到連邊盒奶個紙盒靚啲都可以嘈半個鐘，

至於碗燒賣魚旦？

算啦。