Another Sherry?

其實由細到大，

老豆呀媽都好似無俾過任何有建設性既意見我，

小學自己揀，

中學自己揀，

大學自己揀，

去邊自己揀，

聽聞佢地連我而家讀緊邊間U都唔知，

會考幾多分又唔知，

升到中六後講聲哦跟住去太平館食瑞士汁牛河。



老豆對我既認識就只有利物浦同何韻詩，

我好串，

我中文好好，

呀媽對我既認識係我係一個靚女，

我好好笑，

我中文好好，

我應該好多人追，

而多數佢地最後都會補一句，

我同佢地後生陣一模一樣，

真係成家都係自大狂。



有時佢地會用好驕傲既語氣話俾我知我同佢地後生時一模一樣，

呀媽話：呀媽無咩叻，最叻就係生到你同細佬。

我答：點同呢！你靚呀嘛。

佢就會話：係囉，你呀媽後生時好多人追，好彩你似我唔似老豆。
                    咁我無腦都有咁多人追，你有腦又靚女，實唔洗做剩女。



其實我一直覺得我的確係老豆呀媽人生中最大既achievement，

看盡一堆港爸港媽逼到個仔不似人型，

老豆呀媽送俾我既唔係知識與金錢，

而係一堆難能可貴既性格、人生觀、態度同自由。



叻唔叻係靠自己努力呀媽點逼都無用，

如果呀媽除左送個仔去學一堆野之外，

無留低任何自己特質俾自己仔女，

咁當然香港人又真係好唔了解自己，

只係會為社會製造多一個唔知點供樓既打工仔。



我成日見到啲小朋友識八國語言又點，

同機械人完全無分別，

有時呀媽會怨自己唔夠叻教唔到我啲咩，

但其實每次有人話我好似佢地，

我都好慶幸佢地已經將自己最好既野俾哂我。



好多朋友好羨慕我同屋企人咁friend，

同老豆傾計好似同男朋友傾計無黎正經，

一切都係因為珍惜，

講真屋企人真係唔會陪你過世，

凡事唔好到失去先黎珍惜，

愛係無限，

但時間空間有限，

所以唔好浪費一分一秒，

更加唔好浪費自己愛既能力，

有能力就要去表達，

有時哄下屋企人都係大家開心，

嘈少句啦。



－



之前睇過卓韻芝本書話佢生仔只有兩個結果：

一係個仔鬧返佢轉頭，

一係就另一個卓韻芝。



上年暑假同朋友係大澳飲啤酒傾計，

佢地話好期待我第時仔女會點，

同時討論到我第時個老公應該好正經，

通常好似我呢啲麻煩人馬座最後都多數俾天收有個好正經既人blend返勻，

實情又係好多人都買定哂花生等睇作惡多端既我比天收，

而同時多數好正經既人係需要我呢類chaos搞亂佢地無聊既人生，

哈哈又真係之前幾個男朋友都話我既出現簡直係一個颱風，

哎呀! 

仲諗住我有條件搵個山本耀司型有無敵抑鬱側面既設計師添。

世界上多一個強化版楊麗珊應該好正，

另一位朋友勸我唔好再為世界增添麻煩，

但我好期待第時教出另一個sherry yeung，

同時佢可以係我走左之後將我既精神一直延續，

世界真係需要一個sherry yeung囉。



哈哈咪只希望第時個老公識教佢點綁鞋帶囉，

我係唔識架啦，

頂多教你點分東德同西德，

又頂多教你點樣增強自信，

又可以帶你去睇利物浦點離哂譜咁又碌到入FA cup Final，

人生教練教整容呢呀媽我就無咩研究啦，

教你做性格巨星都仲有資格既呀女。



聽日開學，

死火我真係好期待好多野想做，

希望唔好悲劇收場，

同時希望自己仲有時間得閒一路飲afternoon blend一路聽傅佩嘉一路打文，

Ciao!