小三對奕/純正倫敦人/華麗逃亡

29/7 小三對奕

收到一個電郵，
內容為：
我的男友每天都會看你的blog，
你是誰？
你與我男友有什麼關係？

然後我回覆了：
Dear Joyce,
我的Blogspot每星期有數千訪客，
而計Xanga在內的則有過萬，
抱歉，
你男友是誰？
Love,
Sherry

她的回覆：
別裝模作樣，
你是不是小三？

我的回覆：
妹妹，
來來往往年中數十萬，
把每個都搭上的話，
應該沒空回你的電郵。
而且我人懶，
不喜歡太忙，
所以理應有點射手座式的專一，
而如果我愛的那位(邏輯上)是你的，
那或許我們都應該認命。

她說：
你為何搶我的男友？
我真的很愛我男友。

我說：
愛？
好吧，
雖然我連你的男友是誰都還沒弄清，
但反正這二十年來，
我無論搭上誰都會被加冕小三之名，
看你怨氣濃烈，
且當我是小三吧，
願聞其詳。

她說：
我每天都會等他來電等他覆我的短訊，
他最近不再立刻回覆了，
每一次都拖個三五七小時才裝模作樣敷衍一下，
我看一下他的瀏覽器，
歷史上每天都有你的網誌。

我冷笑然後如此回覆：
噢原來如此。
告訴你吧，
我上次收到他消息已是六天前，
好像只有五句起六句止吧，
上次真正與他交談已是hmm..忘了，
久遠得好像連電話都由3Gs換4G了。

算了吧妹妹，
我現在還活生生與你談笑風生，
像說笑般道出以上那數句血淋淋的句子，
你還有什麼好要求？
你如我般心理不平衡一整年的話，
或許早瘋了吧。

還有，
你有心看一下我的文字的話，
字裡行間會發現我是一個迷戀自我沒出息的小人，
還需那該死的自尊伴過餘生，
而我如此奢侈地消磨意志，
基本上都快把自己虛耗壓榨至香水地步，
諷刺的是不幸地時至今時今日，
小妹都還未大去一息尚存。

如果我要出書的話，
理應取材自我要安樂死或我還未死得。

又或許假以時日，
你會如我般，
連火花都化。


傻妹。


P.S. 我還是沒知曉你男友是誰。


-


28/7 純正倫敦人



倫敦，
咪就係你望住佢玩野亂9咁黎，
講聲痴線然後心都甜哂暗笑囉。

唔可以讚佢架，
一定要鬧，
仲要係陰柔地抽下水咁，
抽到咁上下，
見到佢懶懶閒who fuckin' cares個死樣又忍唔住偷笑，
笑完之後又扮無笑繼續愛恨交纏地鬧。

行過Tower Bridge、St.Paul's用個未訓醒既冷漠樣毫不關心，
從來唔會加以任何欣賞與驚嘆，
就好似各式地標起出黎作用就係被倫敦人忽視，
而見到啲人好驚訝嘩嘩聲，
就會扮哂世故講句：
一定係遊客黎啦，
大驚小怪。

去左咩畫展museum唔洗打卡唔洗話你知架，
下你覺得好出奇咩？
我日日都經過成日都去hea架喎。

咁先型，
咁先係純正倫敦人。

係啊我地有musical有concert有Harry Potter有Mr. Bean，
仲有James Bond護送假英女皇跳降傘，
咁英女皇又真係肯陪你癲，
你試下踢胡總落直升機啊啦，
即使唔係真人都叛國啊你。

加上，
直升機咁雞架，
坐包機啦至少，
跳降傘？
有冇煙花加三軍係下面大叫胡總萬歲架。

Beckham坐快艇係泰晤士河企定定chok一chok就收工，
洗鬼飛上天自轉360度，
你地班平民都係要睇BECKHAM姐，
唔係要睇Beckham扮超人啊嘛，
okay完全明白，
咁咪俾個靚仔Beckham你睇囉，
岩數架喎。

小製作但直中紅心，
人懶，
高手不做多餘事，
配以無限自信。

That's London。

所以，
當初我話要出去讀書，
第一時間話：
老豆，
除左倫敦之外，
我邊度都唔會去。

係啊，
我係倫敦人黎架，
但佢最好就搞搞條垃圾tube囉，
仲有啊，
啲野蠻night bus啊，
半夜落大雨得幾度半醉等成粒鐘車仲要中途踢人落車死人架妖。

－


27/7 華麗逃亡


穿上從友人魔衣櫥時裝店借來的Balmain淺藍金花連身裙，
腰上搭上Celine白色粗Belt勉強遮掩不能收拾的脂肪，
腳踏著唯一有41碼的Alexander McQueen白色船跟鞋，
手拿著從意大利購回的墨黑Prada Clutch，
還有那足足如酷刑般弄了兩小時妝髮。

踏出那充滿茉莉香的白色跑車，
一身D&G卡其度假套裝的他，
緩緩伸出那熟悉的強壯手臂，
讓因船跟過高搖搖欲墜的我稍稍小鳥依人一下。

他隨手拿起兩杯放在reception的特色婚禮限定粉色cocktail，
我們就像穿花蝴蝶於人群中跟熟悉的面孔hi與bye，
同時非常有默契及無出息地避開一切不認識的大人物，
但遠遠看到曾經偶像任志剛先生還是不由自主怪叫一聲。

他身旁的，
是那深居簡出優雅得不能直視的林青霞小姐，
上回拜訪她先生為伊人而建的城堡後印象久不能退，
此回再見，
還是無禮地一廂情願為她背後增添神秘仙子光暈。

然後，
那熟悉的雅緻身影向我們幽幽走來，
他身旁極為罕有地出現一位身穿純白紗裙的女伴，
先互換一個曖昧的眼神，
再向我們介紹那是他的未婚妻Alice，
噢，
沒再露出過量肌膚的白紗小天使，
朋友你真古惑。

突然一位手纏金錶的凡夫俗子，
格格不入珠光寶氣地打擾著周遭安寧，
滿口煙臭張開口對我們說了一句：
我記得你地兩個！
大個仔大個女啊！
Sherry & Gordon！

我們異口同聲微笑著回應一句How do you do Uncle Alan?
他把那染著一頭金髮的兒子強行外銷，
真不幸，
他的兒子同樣在倫敦讀書，
看他非住Camden搞punk就理應住Chelsea搞食女house party，
但願將來不會有太多麻煩交集。

寒暄不到十句，
我倆已借頭借路逃之夭夭，
難得成為神仙眷侶，
何必突然來之打破粉色夢幻，
重回那血淋淋的現實。

年輕真好，
讓我們的任性，
還有條件與資格穿著一身錦衣美服華麗地逃亡。

戀上暴風雨的陽光少年

軟攤於沙發上看著ELLEHK collection F/W12，

不太需要用腦，

香港版與法國版相比簡直天與地，

法國版值得逐個細節細看，

港版的，

認真就輸了。



又常言道，

這門浮華的藝術，

適時別要太複雜理論化，

閒時純欣賞就好。



下午三時多，

Gordon扭計要去遊車河，

看一下天色尚可，

穿起米色all star就下樓了。



然後，

十秒電光火石間，

又嘩啦一聲下起暴雨。



無奈的我托著頭扁著咀輕嘆，

“哎呀落少陣啦，又係咁。”



他說：

“下雨時有你在，

世界會變得比較快樂，

或許天總是要趁你在外時下雨，

好讓你身邊的人被你逗得都忘卻雨天的憂愁。”



甜甜地笑了，

上天賜予你一個身份，

定當有著丁點意義。



很多人常說，

下雨時總想起我暴風女神的真正身份，

想著想著，

他們會笑，

笑著想起我。



想一下，

基本上所有在我生命中佔有席位的人，

都曾被我連累一起避過雨。



無論香港的黑雨紅雨一至十號風球，

還是倫敦的例行微雨或忽然暴雨，

意大利的浪漫雨粉，

西班牙的太陽雨，

反正與我外出，

必定難逃一死。



但與我一起狼狽地避著雨、全身濕透的人們，

總邊嘲諷著小妹擁有的神力，

邊淘氣地甜笑著。



車上突然播起了鄭伊健的舊歌，

這次沒有甘心替代你，

取而代之的是一生愛你一個，

仍能情深愛上，

還有愛情歲月。



我沉默著，

享受著這種過度寵愛，

斜眼瞄著駕駛座上，

那愛上暴風雨的陽光少年。



可是，

就如希臘神話，

暴風女神Kelaeno，

並沒愛上光明之神Apollo。



暴風女神總要趕走光明才能發揮威力，

而能令Apollo無奈收起光明投降避走的，

世上，

就只有Kelaeno。



Apollo總是不發一言寵著那任性的暴風女神。



從沒勉強她收起自己的威力，

讓她停止放肆摧毀一切什至自己，

沒有強逼她愛上陽光棄暗投明。



這段時間跟他學習太多，

放手，

真是一門血淋淋的學問。



暴風女神呼風喚雨過後，

不能避免地已大傷元氣。



年復日，

那不畏天地的暴烈漸漸軟化，

她，

還是有弱點，

還是怕受傷。



想起書中曾有一段：

珍惜自己所擁有的，

別刻意去強求不屬於自己的。



他教我的，

理應是：

珍惜自己所擁有的，

放開不屬於自己的。

一星期精選合集

24/7/12






堅鍾意Louis Vuitton F/W 12頂霍格華茲分類帽，

不過最好就無左條就甩雞毛啦，

衫就麻麻，

魔女巫婆始終唔係Marc Jacobs勢力範圍，

都係乖乖地聽話搞返粉紅白色少女夢啦。


有得揀，

梗係唔去葛來分多做勇士，

辛苦又危險，

完全唔符合港女經濟原則。


入史萊哲林做魔女，

出矛招用黑魔法，

等葛來分多去送死咪得囉，

我只需要企定定擺定個pose，

慳水慳力又有型。



－


23/7/12



睇緊小甜回憶錄，
講起細個經常係Xanga Groups起同校人底，
忽然手痕又是但開個Group loop下。


然後，
我見到若干位人兄係個introduction寫：

Inbox me who you are before trying to add me,
I won't accept your request if I don't know you.


啦我唔知grammar岩唔岩，
手快快照copy only，
不嬲都唔識英文麻鬼煩。


你估你何超雲咩，
又唔係靚女，
無諗過add你喎，
咁高貴就咪入group啦，
又要清高，
又要social。


扮VIP，
但實情又唔係VIP，
扮多人add，
實情又無人(想)add。


至少你張相都要說服我好多人亂add你啊大姐。


又要威，
又要戴頭盔。


－


22/7/12



返學係要黎求分數。

如果唔係求分數，
我唔會明明讀文科去背the law of demand，
讀黎托？

如果唔係求分數，
你唔會明明數學只需教加減數就搞掂，
係都要搞場大龍鳳教畢氏定理，
教黎托？

中學時代，
目標明確，
九唔搭八之事以最基本十五年past paper hea之，
坐定定同隔離位做完past paper求分數之後，
咪各自拎本小說散文唔知咩書出黎求學囉。

面對現實啦，
返學只係用黎求分數、媾仔媾女、遲到早退同升U。

真正求學，
唔洗返學架。

返學，
根本就係朝九晚五之事。

返學唔求分數，
咪只係你concept唔清囉，
或者對香港教育有不必要期望囉。


－


22/7/12


一本書可以做到睇完每一篇後，
讀者都非常自然地講一聲屌，
其實真係唔容易。

好彩佢開頭已經講明，
男人黎至三個鄰近星球：
小那星、妖那星、那星，
所以我毫無保留地不停小那星。

離q哂譜，
我信你一成，
腳趾都失靈。

又要睇又要小，
小完又係繼續睇。

同埋okay，
I have to say，
你講中左，
其實，
我又真係信，
唔信我唔會睇，
因為我係女人。


23/7/12


同朋友傾傾下電話發現，
灘叔本書，
只有一個story。

一個無知少女徹底中伏與被騙。

本書出版目的根本就係以媾女為大前提，
講一堆廢話哄到班女讀者又要笑又要屌，
然後發現自己，
平時就係咁中伏受媾。

基本上，
係一本非常practical既工具書。

Where's Wally?

接近十時，

接到一個短訊。



下樓後，

有一個穿著紅白間條中袖衛衣，

黑色褲子搭卡其色帆船鞋，

頸上還掛了一條黑白間條頸巾的人走出車廂，

我依稀記得他是誰，

下意識輕聲自言自語：

嘩...Wally啊。



接著，

他原地轉了兩個圈，

走到我的面前，

說了聲hi。



然後，

我哭了。



還哭得很慘。



就像從來沒哭過那般發著狂地哭。



很久沒有哭得如此慘烈。



哭得像被放逐宇宙的一顆星塵怏要自我毀滅。



一直狂哭。



就像很久很久以前，

一位好友離世的那時，

伏在同一個人身上一直狂哭。



他了解，

他明白，

就像很久很久的那時。



我說：

我沒有了心跳。



他說：

不要緊，

反正我還有很多時間。



我說：

我特地去買了三本Where's Wally，

找到了很多個Wally，

但就總不是我想要的Wally。



他說：

那下次，

你悶了，

不想再找Wally了，

就告訴我吧，

我站在你面前讓你找個夠。



我說：

我很乖地捱完了，

我很努力地捱完了，

但天沒有給我一點獎勵，

我找不到Wally。



他拍拍我的頭，

再也沒有說話。



就像很久很久的以前，

那個我不太想回到的那時。

致向左走的你

仍然在Jetlag。



這句說話很詭異，

身處廿四小時運作的香港，

Jetlag這件事理應是不存在的。



照常十二時上床嘗試入睡，

放下眼鏡躺在床上亂按iPad，

最近找到了一個關於Jazz History的App，

看看歷史聽聽音樂還算比蘋果動新聞有趣，

那些歷史由維基而來，

可信程度應該與動新聞相差無幾，

信不信由你，

反正我信了。



聽著意外地不太催眠的Jazz純音樂，

轉眼已三時，

決定認真地睡了。



這晚認真睡的時數比平常少，

凌晨六時多開始行雷閃電，

上天理應懲罰開冷氣的那些人，

而非把我這個開窗睡的好心人當作仇人，

噢，

沒那麼偉大，

開窗都只因我的萬年鼻敏感與血液中的冰冷基因。



起床後到廚房倒了一杯豆漿放入微波爐加熱，

坐在床上邊喝邊看阿根廷的電影Medianeras，

故事開展於布宜諾斯艾利斯，

一個與香港非常相似的地方，

地少人多樓更多，

由一個海港發展成一個陸軍基地。



不同的是那裡有讓年輕人暫居的鞋盒房，

而香港就是要將鞋盒房再分拆為十間小房，

他們只把鞋盒房當作短期租借的人生中轉站，

而我們，

卻與香港簽下了生死約。



我們與他們都在不同都市的人海中玩著Where's Wally，

你向左走，

我向右走，

反正能相遇的就叫命中注定，

街上每天有數千萬人在你身旁走過，

卻叫有緣無份。



緣份這個藉口很任性，

都係人講你就信，

或者你先洗自己腦，

再講俾人知，

人地就會信。



然後看著看著又睡著了。



再睡醒，

已是中午十二時。



走出客廳，

拿了一個牛奶饅頭躺在床上繼續看剩餘的二十六分三十八秒，

門鈴響起，

不知為何總要裝模作樣在門上的貓眼瞄一下門外是誰，

可能是滿足童年時代好奇。



小時沒有足夠的身高，

總對那個貓眼很好奇，

現在長大了，

163厘米說高不高比下有餘，

足夠讓我滿足無意義地像個大人般看貓眼的慾望，

好讓身旁的小孩子們羨慕我是一個大人這個事實，

其實，

真的沒什麼好看，

大人總愛做無意義卻又懶神秘的事。



如常收下了郵差送來的掛號信，

簽下永遠少了個e或者r的sherry，

自搬到九龍後，

那個郵差十年如一日都是戴著那副眼鏡，

永遠像很趕時間般閃閃縮縮，

逃避我試圖想要接觸他眼球的頑皮意念，

他應該是宅男底。



把信放在老豆桌上後又回到我的房間繼續看那十四分零六秒，

細佬打開他那不斷噴出冷氣的房門走出客廳，

看著桌上的包子問：那是什麼？

我答了一句：蓮茸包。

他再問：包子裡是什麼？

我再拋了一句：蓮茸。

他說：哦。



然後我心想，

難道蓮茸包裡面的是奶黃嗎？

但我沒有把這句話說出口，

女仔，

都係神秘啲好。



然後我呆看著桌上新買的那隻鋼錶，

那是一隻黑底螢光粉紅字膠包黑鋼行針錶，

想起昨天在左手戴上的大一碼同款黑字男裝情侶錶，

在想，

要不要把黑色的都買下，

好了結這場向左走向右走的無聊戲碼。



如果某一天偶遇某一個人戴上了螢光粉紅的另一半，

儘管這世上有千千萬萬隻同款錶，

我還是會相信，

我們是理應結識的，

這是一個相當好的marketing，

情侶錶，

的確是有很大市場的。



戲中女主角說：

我是一顆星球裡非常小的一部分，

在宇宙中，

在銀河中的一小點。



如同成千上萬的銀河系從宇宙分裂出的一部分，

我是永恆的、無限的整體宇宙其中一部分。



現在是十四時零四分，

正在看電影吃著加了意大利紅酒醋的魚旦粉，

你好嗎？

我是一支患有強逼症的洗頭水

人們常說令人有共鳴的就是一套好電影。

共鳴代表回憶，

我不明白，

人平常已廿四小時回憶回憶再回憶，

連看套戲都還要輪迴在記憶當中，

很悶。

不會裝作只看好像很文藝的電影，

我愛古惑仔愛看新不了情，

看得太多，

忽然走歪一點的路，

戴上另一副粉紅色眼鏡，

讓這理所當然世界有趣一點。

何況，

無限套那些年已對我起不了什麼作用，

我的回憶屬於我的，

不用你來提醒，

又是那些回憶，

很悶。

－

故事不太理所當然的，

有點離譜的有點無聊的，

會被稱為非主流電影，

在我眼中，

這些電影帶給我很多從未想過的生存模式。

必須聲明我是一個非常無聊的人，

用十五分鐘看Andy Warhol吃Burger King套餐連汽水於我而言，

是一件很有趣的事，

自從看過他那套短片後，

我愛上觀察人們進食時的習慣與小動作。

然後發現，

因為人每天都要食幾次飯，

久而久之人們通常會放下戒心無線新聞是是旦旦，

那多數是人們一天中，

最樣衰的時刻。

最後，

我學會了Andy Warhol進食法，

無時無刻都假設有部Camera在拍著自己，

潛意識間進食時比較優雅造作，

而當一個人在你面前狼吞虎嚥時，

你覺得他很可愛，

你就是在戀愛了。

－

中四時，

曾有一天在客廳中用接近三個小時發呆，

啊媽又一如往常好驚覺得我讀書好辛苦，

因為佢成日都問我有冇事。

其實腦海中一早建構好很多故事，

但我很自私，

有些故事只屬於我的，

不想告訴別人。

曾經寫過一篇洗頭水的自白，

由於我非常緊張自己的頭髮，

小時除了我愛的人外，

從來沒有人敢碰我的一根頭髮。

那篇文章sherry幻想自己是一瓶患有強逼症的洗頭水，

每天偷窺她的愛人洗澡，

還要徹底控制他的頭髮，

他的頭髮要變得非常柔軟就如她的，

頭髮的香味由她全權控制，

但泡沫綿密如詩，

而且十分溫和不會弄痛雙眼，

所以他可以眼看著洗髮水的泡沫在他眼前流動。

一天，

他受夠了，

為擺脫她的控制隨手把她丟棄，

而她只是一件死物眼睜睜看著他離去。

那男的轉用其他洗髮水後，

才懷念起舊的那瓶強烈中又為溫柔折腰的洗頭水，

但那是一支很有型的洗頭水，

生怕會再次被拋棄，

早就把自己毀滅了。

為了這個故事，

我做了很多research，

還製作了自己的洗髮水配方。

－

還有另一個在香港中學教育中算是很離譜的故事。

描寫紅色。

我寫了一雙紅色高跟鞋相戀的故事，

取材自何韻詩的勞斯萊斯。

這個故事大約是：

左邊的高跟鞋愛上了和自己長得一模一樣的右邊，

世俗認為兩隻相同的鞋是不可相戀的，

而啊右是一隻非常世俗的高跟鞋。

啊左把自己的跟折斷，

向啊右表示它已不是高跟鞋了，

而啊右愛的，

是啊左那隻和自己一樣的優雅高跟，

如果啊右老早就愛平底鞋的話，

就不會愛上啊左了。

一切太遲，

回不去了。

然後這篇文章因尺度太大發還重作。

我重寫了另外一篇，

那篇是右邊的紅色高跟鞋，

強逼自己愛上鄰座的白色帆布鞋，

卻永遠忘不了左邊的高跟鞋。

－

慣常用文字好像很有型地衝擊香港教育尺度，

當然我唔知到底係學校制度定教育尺度，

在學校寫同性戀發還重作，

老師登上我的一篇殺人狂受靶從此不敢再以我的文章入冊，

但我會考時寫了篇限制級情慾文章，

拿了個5*。

真要命。

女仔都係神秘啲好

上個禮拜講過自己好鍾意係Cafe隨意搵人做科幻愛情故事主角，

實情都未同人講過野，

就已經諗定最後點分手，

諗到最後又係分手，

連搭咀都慳返。

以為自己有妄想症好危險，

今日發現，

只要你一日未死，

一定有人癲過你。

－

La Delicatesse

一吻巴黎

男主角一開場係Cafe被Audrey Tautou吸引，

女主角睇Meun，

男主角就開始發姣幻想佢會叫咩飲，

咖啡太陰沉，

茶太沉寂，

果汁活潑甜美，

但唔係所有果汁都岩，

唔可以太平凡又唔可以太aggressive，

杏桃汁。

咁拍戲啊嘛Audrey Tautou實點杏桃汁架屈機既，

男主角估中左去搭咀，

走時門外一吻定情。

我呢類小妹妹浪漫得黎淆底，

激烈實踐都係留俾法國電影男女主角，

我無咁既福份，

所以無得定情，

都係坐定定乖乖地食carrot cake睇書吧啦。

又其實，

我好正常，

真係無妄想症。

－

又一日，

返工前發現支筆無墨，

左搵右搵，

十成呀媽整唔見支墨，

 咁當你發現呀媽執過房，

唔見咩都實會賴係呀媽整唔見。

支筆無墨喎咁大件事，

大條道理魂不附體神不守舍，

又coffee break時Gordon見我係咁轉支空筆心知不妙，

我好悲傷地話：

支墨得歐洲先有得賣架。

佢拎我支筆拆支墨黎睇，

話知係邊度買到，

識左佢咁多年，

終於都有藉口覺得佢好man。

－

然後佢開始職業病分析我啲野點解又紅又黃咁熱鬧，

潛意識下開始收埋啲野，

唔知幾時開始，

我想自己神秘啲唔好咩都話哂俾人知，

喜怒哀樂都放哂上面，

有個句講個句又易哄，

易哄，

即係唔洗哄，

女仔都係扭擰下神神秘秘黑下面好。

加上人地又唔會咩都話返俾我知喎，

好蝕底。

跟住佢話：

你收埋都無用架喎傻妹，

你連個袋都螢光粉紅色，

點收，

都係蝕底架啦。

然後，

我好唔開心，

因為真心覺得，

女仔都係神秘啲好。

咁你又唔好問我無啦啦發咩神經要神秘啲，

我不嬲都九唔搭八架啦。

:(

－

今朝返office前信箱有一個黑色信封，

入面有一支墨，

用一張信紙包住，

打開張紙，

入面寫住：

我唔會話你知係邊買，

所以你一定要叫我買。

我都話神秘啲好架啦。

－

連日黎終於悟出左一個道理，

就係要讀好啲英文，

唔好成日串錯字。

又或者串錯字神秘啲卦，

女仔，

都係神秘啲好。

越獄之後

成件事簡直就好似地球世界末日之後，

小妹作為一個外星秘密組織間牒任務完成，

同志們派余文樂王子黎接我返火星，

然後火星大帝正式恢復小妹火星公民身份，

從此Sherry就同火星王子過住幸福快樂既生活。



返回火星途中，

與外星朋友分享劫後餘生經過，

雖然佢同余文樂比仲係差幾皮，

算啦好啦將就下先啦。



S : 嘩頂啊 好彩當初打死唔讀Business

K : 好似得我地兩個九唔搭八

S : Gordon計唔計？我仲等緊佢讀完psycho醫我啲妄想同幻覺

     早排日日俾人咁恐嚇法差啲要醫埋恐慌症 心理唔多平衡

     你又無Bosco咁靚仔護花危情喎

     老老實實有少少創傷後遺症

K : 你有排都未死 佢識唔識醫喪屍 再唔醫佢地遲早出去食人

S : 打個電話俾G備定案 有錢搵唔好益外人 你估彈客俾佢有冇佣收？




S : 你琴日有冇聽到Uncle X問我第時係咪想做張愛玲

K : 哈哈哈 收皮啦你肥婆想學人著旗袍 btw仲係咁q串

S : 串左十幾年無咩感覺 問題係我都唔睇張愛玲既

      幾驚佢問張愛玲生平 恐慌到細個老師抽背書咁

K : 細個佢地聽唔知咩樂團悶到hihi 我地開CD機聽草蜢 佢問我地第時係咪想做天王巨星

S : 有咩？我細個已經有咁遠大理想架啦？我當時點答啊？

K : 你答想做電視機入面啲人 白痴妹

S : 你答佢咩？

K : 我話想整部好大既電視機

S : G呢？

K : 佢話佢唔睇電視 只係睇卡通片

S : 哈哈哈哈哈好philosophy 唔聲唔聲收收埋埋最癲個係佢

K : 我仲記得X個仔好高音話佢第時想起樓

S : 嘩原來我地三個咁細個就咁無深度 三歲就預左八十齊齊去乞食架喎

K : 記唔記得Jeffrey細個同我地癲架 前日係office見到佢好似機械人咁

S : 哈哈  佢開心咪得囉 或者人地有興趣讀business做management呢 我地唔鍾意姐

K : 咁又係 十幾年後都係得我地三條友不務正業係英國搞藝術搞哲學




K : 好彩有你兩個 如果唔係我應該都跟佢地去讀business

S : 唔關我事喎 Gordon囉 佢意志最堅定 我都非常勉強地讀過三個月Management

K : 佢地十幾個喎 真係好難抵抗 個個UP間U名出黎我都可以即時被自殺

S : 佢地係堅勁 這些機會不是我的 我好清楚我無咁既能力

      你兩條友都King's n Imperial啦 次次uncle auntie問起都係我第一個受靶

K : 你遲過去姐 就算你high school同我地一齊過去 都九成揀UAL啦

S : 哈哈哈 咁我鍾意讀media同art嘛 你都唔想見你aiya呀妹搵得錢黎無命洗

K : 哈哈我地三隻小綿羊太善良

S : 開心就得啦

願我到死未悔改

當我打完Facebook關於何韻詩個回應之後，

即刻有人黎攻擊我：

人地由孿變返直，

唔祝福咪算仲要delete人。



首先，

我唔知佢地係孿定直，

孿又點直又點？

真係好想問：

到底同性戀曾幾何時得罪閣下導致你認為同性戀係一宗原罪？

我唔係正義撚要fight for gay rights，

同性戀從來無對我人生做成任何傷害或困擾，

so I don't care at all。



個人認為所有人都係中性，

性別意識只係後天社會教育男女“應該”係點，

由細到大我鍾意著咩就著咩，

I don't care女仔要行公主路線又到底可唔可以著男裝，

我由中三開始用男裝oversize恤衫襯黑色傘裙搭Dr. Martens感覺非常良好。



從來唔覺得男裝同女裝有咩分別，

小妹眼中所有市面上garment都只係衫與裙，

重點在於我主觀意願鍾意咩想著咩，

唔係你話俾我知應該要著咩，

that's why我腦海一直唔存在任何男就一定要同女一齊既假設，

愛就愛，

唔愛就唔愛。



根據個人觀察，

我唔見得異性戀者好識去愛人，

同時唔見得同性戀者就係唔知自己做緊咩，

同性戀異性戀各自有好人與仆街，

所以唔存在所謂先天性正義立場。



我無任何宗教信仰，

唔存在女性由男性肋骨造出黎用途在於陪伴男性或者所謂傳宗接代天性思想，

只知道愛就愛恨就恨，

我愛你，

就因為我愛你，

唔係因為你係一個男人或者女人，

同性或者異性。



－



第二，

delete人。



唔好意思開心share先，

小妹拍過三次拖，

三次分手都即時delete對方眼都唔眨，

有位直頭五年後先add返，

如果咁係仆街的話，

隨你喜歡I don't care。



如果閣下一世無試過憎人的話，

咁你絕對有資格用鞋飛我，

借埋俾你又點話，

Dr. Martens鐵頭鞋都無問題。



如果你要我扮到自己好偉大，

望住個ex係我個Facebook篤眼篤鼻，

自己又好似自虐狂不停loop佢個Facebook page，

擺到明唔開心仲要笑哂口祝福人白頭到老的話，

你絕對有資格殺左我，

因為我做唔到。



小妹不才cheapcheap地擺明車馬就係要delete你，

學lord sugar講句：this is my Facebook, btw this is my life, you are fired.



無打算扮可憐扮抑鬱症又或者懶係Facebook過度活躍症，

Sorry實情係不屑引起你任何注意，

引起你注意又話煩消失又話絕，

實情係都分左手我要做咩關你鬼事，

仲有啲九唔搭八花生友更加who fuckin' cares。



加上要振作第一步就係斬欖，

除非唔想或未想振作。



最憎人扮哂感性撚話唔想你唔開心，

屌本小姐洗撚你可憐，

又或者我要可憐你就唔會飛你啦，

紅黑紅紅黑，

就係咁簡單。



Delete時老老實實覺得好爽好型簡直有王傑式光環，

喂我而家失戀大哂，

自己都未顧得掂仲得閒理你感受諗聽日自己會唔會上港聞版啊？

喊完十八分鐘又係一條烈女，

從來唔追求永恆，

只追求一剎那delete你既快感，

諗起都興奮。



－








實情係佢同我價值觀非常相似，

加上義氣仔女絕對唔會輸打嬴要，

何韻詩硬頸時我都唔輸蝕，

講真你地同我講何韻詩點點點，

陰謀論黎計都係想我附和，

如果你地係咁堅定認定佢係仆街的話又說服我搏取成功感？



如果因為你地講一兩句就否定自己十幾年黎既信仰，

我仲有咩需要堅持？

我仲憑咩話自己係Sherry Yeung？

唔好話盲目唔盲目，

痴線，

我唔會逼自己鍾意啲我唔鍾意既野，

我要愛，

就盡全力愛我所愛，

要恨，

都係我自己話要恨先會恨唔洗你地以正義之名教化我。



唔好意思，

我唔止得閒無事係Facebook放首鋼鐵是怎樣鍊成的傷春悲秋打J就算，

嚴重講句無佢就無今日既我。



同時願我到死未悔改。

小學雞真係小學雞

去完Meeting後搭亡命小巴返屋企，

本身已經暈暈地加上又著足一日高跟鞋，

過書院道馬路時突然有架車剷埋黎，

嚇一嚇失平衡係馬路中間跌低，

認真覺得自己命仔凍過水係時候玩完。



然後有個人衝落車say一萬句sorry，

好頹地話唔緊要係我無睇路，

當時個腦仲諗起聽晚要睇何韻詩可唔可以唔死住，

執起個clutch抬頭一望見到係林嘉堯...............



第一件事除左我自己對鞋逼佢俾對鞋我著先，

第二件事即使小妹柔弱無力都出盡全力打左先，

男人唔會明女人用高跟鞋車落男人度到底有幾爽，

個人認為車水杯有五粒星車電話有七粒星的話，

車鞋絕對有二十粒半星高跟的話再加三粒半，

依稀記得連“我憎死你啊”小學台詞都爆埋出黎，

差在未好似細個起哂飛腳恐嚇“話俾你呀媽知”，

小學雞朋友真係一世都只可以停留係小學雞階段。



仲話為表鼓勵帶我去食宵夜，

明明九龍城有百9幾間宵夜係都要車我去銅鑼灣，

明明岩岩係天后返九龍塘又要係九龍城去銅鑼灣，

有車大哂咁巴閉返屯門食燉奶佬集體回憶啊笨，

仲！要！落！雨！

頂你個肺去銅鑼灣食碗牛腩撈粗仲！要！落！雨！

仲！要！賴！我！



成件事完全唔make sense，

真係憎死你。



一輪無聊混亂後又開工刨Contract，

律師仔個未婚妻又蜜糖水又生果，

好羨慕，

可能又病又攰兩晚通宵意志力好薄弱卦。



即係我地做緊野啊林生係後面睇Spiderman，

唔好再同我講超級英雄系列係男人的浪漫，

聽親都把幾火，

咁浪漫我唔見你著套蜘蛛俠衫開窗用蜘蛛絲飛落喇沙利道，

你實浪漫架坐係度食人地啲西瓜開人地個projector睇spiderman仲問有冇3D。



同埋唔好再俾我見到Galaxy Note，

咁大部除左要黎打乒乓波或者當洗衫板之外我諗唔到任何建設性，

男人的浪漫我睇你唔拎袋出街窄腳褲又袋唔落，

係都要用手拎住部咁q大部既電話會有幾浪漫，

真係見親呢條友都無名火起。



其實仲有幾個通宵要捱都未知，

應該會無事卦，

呀嫂話好彩我當初無好似其他無知少女俾大少爺個樣呃到，

唔好意思佢係連樣都無，

taste差極都未至於咁差。



吹啊，

咬我啊笨。



－

好好過

其實香港真係唔適合人居住，

身處英國日日淋雨咳都無聲，

返黎十幾日鼻敏感咳到甩肺，

咁搞法好快咳到哮喘復發，

不久將來又要入院深切治療。



因某些原因琴晚同位律師仔通宵刨幾百頁合約，

勾起中學時做AL History DBQ不快回憶，

飲左四五六七唔記得幾多杯咖啡手都震，

一路打乞嚏一路飲咖啡真係玩命，

遲早流流下鼻水變流鼻血，

睇到頭暈暈律師仔講左句你都幾捱得，

我答：

咁咪唔好囉，

第時想舒舒服服做個少奶奶都唔得，

辛苦命。



－

其實得五篇無八篇咁多，

哈哈。



我又唔覺呢份係Job，

舒舒服服打下文，

廢唔廢話又另作別論，

一係唔做，

一係就做好啲，

第時諗返起至少唔覺得自己柒，

對得住自己。



睇睇下合約都用十分鐘打篇文submit，

律師仔叫我唔好打傷神仲有排抗戰，

咁我覺得雖然只係打篇文，

但係責任問題，

話左做，

就要做。



部分內容如下：



以下為藝術家Misha Kahn的作品Choose your own adventure，




上圖為白日夢框架，

下圖則表達人們須親手把夢想逐件放進夢想框架中，

完成一件屬於自己人生的藝術品。







可能當時個腦諗咩就傾向搵咩材料，

近排諗緊家庭問題，

好想建立一個屬於自己既家庭，

好想話俾仔女聽世界好多新奇事物一百歲唔死都有新聞聽，

好想話俾佢地聽佢地公公婆婆從小點樣教我世界其實好美好，

好想話帶佢地見從小到大一直錫我愛我既親戚朋友，

好想親手將一間已經存在係我內心十幾年既夢想小屋藍圖填滿。



唔單止我自己要成為一個好人，

仲要教導下一代成為一個心地善良既人，

為世界製造多一點微笑，

多一點美好。



琴日同細個負責照顧我好錫我既姨姨去飲茶，

呀媽話呀姨一世人有三個女，

佢自己兩個女之外就係我，

錫我仲錫過佢自己兩個女。



諗起當初姨姨點樣無條件愛我錫我，

每個小女孩成長時總會對自己有懷疑，

而佢當初成日話我笑起上黎好靚，

令當時覺得自己好男仔頭同世界格格不入既我有返些微自信識得笑，

而表妹仍然係無咩自信好少笑，

我決定用呀姨送俾我既微笑拖表妹去Jusco買雪糕，

我想佢知道，

佢都可以笑得好靚。



然後律師仔話：

做咩次次隔一排見你個腦都進化得咁快？



我答：

因為我真係有用腦，

哈哈。







－


返屋企時撞到前男友，

沒說話，

微笑點頭後，

踏著我的高跟鞋，

抬頭大步向前走。



當然今次又係一次過好多事發生，

我都估到暴風雨前夕一定係風平浪靜，

靜左十幾日終於黎料。



如常熱情工作，

生活仍然要過，

唔止要過，

仲要好好過。









＊由於我成晚無訓一陣仲有meeting，

所以打文吊住條命，

好亂，

sor。

我不快樂

近日很喜歡無故在街上隨機找一個人來觀察，

以往有鋪無心偷聽癮常留意附近周圍人們的對話，

現在受到報應耳朵還未完全康復，

卻愛上用另一種感官偷窺人與人之間的互動。

忘了哪一天在Cafe等朋友收工，

喝著著實酸得有點離譜的Raspberry tea四處呆望，

那天出外前在看巴特根據《少年維特的煩惱》作情感分析的《戀人絮語》，

書中集中解構戀人們經由文字作為情感符號表現沉溺於愛情中的種種跡象，

想著想著決定用十分鐘觀察斜對面的一對情侶。

沒什麼得著，

看他們熟練的姿勢已沒有什麼情感可言，

女的手中拿著ELLE Wedding，

男的手中拿著手機一直埋頭苦幹，

又是一對人生即將完結的情侶。

轉移視線緊盯一位非常有質素的靚仔，

十秒間決定很浪漫地用十分鐘愛上他，

我的腦中出現了以下畫面：

很不小心地把咖啡倒在他的身上以便邂逅，

坐下聊天發現大家都愛看足球與黑白電影，

一段時間之後那位靚仔將會每天致電問我食左飯未，

再不久的將來我們就會在Cafe過無數個平凡的下午，

我拿著ELLE Wedding，

他拿著手機，

我不再拿螢光粉紅色的clutch，

他不再剪余文樂的髮型，

一起同歸於盡。

暗自讚許自己像蘇菲一樣完成了一次完美的邏輯推理實驗，

這段迷糊的戀情在不到十分鐘就宣告玩完，

我不再愛他了，

就如其他故事的結局一樣。

－

與朋友去看The Dictator，

發現了油麻地有一個名為百老匯電影中心的世外桃源，

鄰座有一位穿著校服自己去看戲的女生，

為欣賞她的我行我素決定與她分享手中的爆谷。

－

然後我在想存在這個問題，

證明自己存在之餘，

更是證明自己存在於他人生命，

自己的靈魂存在於自身之內，

如何把自己一片靈魂分拆再植入他人靈魂短期生長，

我稱這樣的行為是渴望逃離被隔離的世界，

渴望被愛。

存在如一件無形的事，

不能勉強自己進入他人的靈魂，

一廂情願分拆的靈魂，

不代表別人會照單全收，

而且不能左右自身靈魂於別人靈魂中存在的重量，

同時不能強逼自己去證明自己在別人心中所佔的份量，

我學習了，

愛，

不應強求。

－

我不快樂，

今天，

勇敢而誠實地跟朋友說：

我不快樂。

從前很少跟人說這件事，

別人沒有義務去接收不屬於他們的負面情緒，

沒有義務去照顧別人的不快樂，

很怕很怕會成為別人的負擔，

我認為自己吸引人的地方在於正面與獨立，

一旦表露出一絲負面與依賴，

就會失去了別人對我的好感，

我很怕別人不再愛我。

然後在我人生中扮演著重要角色的導師解釋好的定義在於：

Not hurting anyone.

我對此的解讀包括不可傷害自己，

所以此刻，

理應讓朋友保護一直在用負面情緒傷害自己的我，

而他們，

根本從沒介意過與我分享一點愛。

朋友很誠實地跟我說：

你有權不快樂。



然後發現，

從某一件事起，

一直覺得自己不再可愛，

找到這個腐朽的源頭後，

是時候離開那片只剩下強酸的土壤。

能預料，

明天的我將會非常不快樂，

平常到處分享氾濫的愛時，

會認為自己好像擁有用不盡的愛，

而當你需要愛時，

當你需要被保護時，

才會發現自己，

多麼缺乏愛。

咁快又十五年

蘇格拉底著重啟發思考，

他如流浪漢裝作一無所知於雅典市內向不同人提出疑問，

上至智者下至奴僕，

他認為人有屬於自己的常識理智，

善惡是非有一套永恆法則，

透過討論發掘到個人內心自行發展的理論後，

即能“人能知善，便能行善。”。



詭辯學派則認為判斷對錯源於社會環境，

不同社會需配以不同尺度，

故此善惡是非是流動的，

詭辯學家提出懷疑論：

“智者就算找到關於是非的答案同樣不能解決自然界的謎團。”

所以傾向學習與教授真實可信的知識，

而非著重於討論與發掘思考。



前者被稱為哲學家Philosopher，

意指愛好思考的人，

後者被稱為學者Sophist，

意指擁有大量知識的人。



現在香港走向無疑是向學者方向行走，

擁有大量知識卻沒有自己一套理論，

很多人叫我七一要上街，

猶如不上街就是一名與民為敵的仆街，

香港難得的示威自由確實需要珍惜，

但認真地說一句：

如果我是被你叫出去示威的，

而不是我想通想透得出結論後才上街的，

意義何在？

一直很羨慕從前中國學生周報一班有識之士以文會友，

經一番研究思考後用文字表達所思所想，

再經一番討論後才挾自由開放之名上街，

而我身處這個年代只是想找一位有識之士心平氣和聊個天喝口茶，

卻只得這個回應：

“上街吧”。



S: Sherry  G: 社運人士

S : “為何要上街？”

G : “因為我們的人權自由被威脅。”

S : 如何被威脅？

G : 我們沒能選出自己的特首，那是我們的基本人權。

S : 那讓你選，你可以選誰？

G : 至少不會是貪污腐敗的大話精。

S : 那讓你可以選了，有誰願意手執此左右做人難的熨手山竽？

S : 有誰能勝任？



空有推翻之心，

而無改革之意，

何如？



再看近日有關新任特首的新聞，

僭建六四僭建李旺洋僭建，

有位蘋果日報記者認為自己很有型，

向胡總大叫一句“香港人希望平反六四”就自命英雄，

seriously，

你希望平反六四，

你希望如何平反六四？

你為何希望平反六四？

係唔係你9叫一句就可以平反到六四？

但我唔否認係一條幾有noise既蘋果動新聞。



又例如僭建風波，

僭建無限loop完全轉移視線而班記者仲覺得自己好緊貼時事，

新班子記者會時基本上每一位都被問家中有否僭建，

我唔想知道佢地屋企裝修成點，

seriously佢屋企就算有鬼又點，

關我撚事。



我只係想知啊廣東省政協如何得到該職位，

仲有啊林鄭月娥女士素聞你好打得，

你在任其間會唔會更打得強推網絡二十三條打倒高登仔，

當然啦，

啊李慧琼小姐入行會都係世界末日前十大迷思黎架啦。



望望現在的所謂學生刊物，

所登出之文均為我的成功之道，

不然就是自以為很有料到的傷春悲秋堆砌之文，

還幸小妹不才沒賣弄文筆的天賦，

假若上街會遇到蘇格拉底傾傾社會學當然胡椒噴霧對正我對眼都會出，

假若上街會遇到有識之士討論如何建構香港社會當然衝擊中港圍牆我都會去，

但出去各自為政目的模糊地轉個大運，

倒不如係屋企睇柏拉圖思考下人生。

國際親善小姐

親身認證，

呀媽去買餸，

最緊要有仔女係身邊。



仔女係身邊即時升價百倍，

話說同細佬左右門神兩支竹咁護送太后上殿，

基本上就成個街市望住呀媽招搖過市，

嘩個樣得戚到呢簡直好似拎左奧斯卡。



再次發現真係唔驚嫁唔出，

翌日呀媽重返軍營接受萬方跪拜時，

接到無數提親邀請，

睇黎都要整返場比武招親。



－



見親人無非四句開場白：

嘩好掛住你啊楊小姐！！

你肥左喎，

但靚左囉，

點解有啲鬼鬼地？



-_-



咁即係肥左定靚左？

實情又係幾時開始鬼鬼地，

好似靜係say左句hello著左條短褲同加左對platform shoes....

除左關心我食左奶黃包未，

呢張相詢問度極高，

由於自拍屬於公開假圖，

但街拍應該有返一定真實程度，

有一位單刀直入問：

睇黎你真係整左容。



-_-



無可否認今次返黎和藹可親笑容可鞠，

溫柔體貼趣緻可人非常斯文，

失驚無神決定做返個可愛教主kawaii呢，

撞邪著桃紅色恤衫裙粉藍色半截傘裙成個日本娃娃咁，

老豆話我除左個size之外都幾嬌俏嘩真係多謝你賞識，

加上近排睇得太多philosophy好似散發大量文藝氣質，

好啦好啦，

當為地球和諧發展作出少許貢獻啦。



－



又話說今日收到情信，

嘩，

情信，

浪漫到手震。



碌上床拆黎睇，

上款為：

Sherry女神。



嘩，

就係因為呢句女神，

我決定逐隻字睇。



望望第一句：

容許我不多說話。



我即刻講左句：

Diu你歌詞黎既。



跟住諗諗，

小妹之前好似都係無限quote，

好，

第二句：

彷彿天和地在挑選我跟你。



一睇就知中伏，

google下，

哈哈哈哈哈哈哈哈，

頂你個肺鄭伊健古惑仔III隻手遮天主題曲，

陳浩南細細粒甘心替代你，

頂唔順真係笑左十分鐘，

但話時話個MV好好睇。



你好野，

我唔係王迪詩唔洗登廣告請我食飯既，

哈哈哈哈哈。