眼淚不會陪你到永恆

不知不覺開學已經半個月，

呀腦終於都開始正常運作，

今日上最熱愛既cultural studies，

朋友全部失蹤，

一個人check off四個人既register，

嗱聽聞我會有士多啤梨pocky同好多野食啦，

聽聞。




上完後要等幾個鐘先有seminar，

期間係study zone搵左好多自己論文想寫既資料，

搵完後，

好安靜地坐後排上seminar。




討論完後，

tutor特登行過黎坐係我後面問我有咩睇法，

其實上堂時已經sense到佢好想問我意見，

因為佢次次問完問題都會望一望我，

不慌不忙地拎本Moleskine出黎講早前readings得出既想法以及未來essay方向，

佢講左一句，

I'm impressed，

其實佢本身以為我好迷惘唔知做緊咩，

結果，

佢結論係year1就得出新理論其實幾有野心，

我用微笑加平穩音調向佢講左一句thanks。




行出學校，

唔知點解今日好凍，

吹左兩下個人醒返，

sherry今日有啲唔同。




從前浮躁唔認輸，

回想起幾個禮拜前seminar仲唔執輸唔想俾人睇死係咁想搭咀，

今日，

多左一份成熟沉穩，

唔再急於表現自己，

平時明明拆聲大叫光榮之家，

今日靜坐台邊輕唱旋木，

係啦，

岩啦，

好似真係大個女啦。




－



一月二十九日，

坐係床上望著一分一秒過去，

0:00 A.M，

ipod正在播放再見不再見，

其實我都只係坐係床上睇書，

打字，

一切如常，

再見不再見，

都無咩改變。




當你睇reading睇到開始有自我毀滅燃燒感，

恭喜哂，

你已經成功與該paper連結，

而連結之日，

正是你休息之時。




喱入被竇摺埋自己用Ipad睇Facebook，

然後打開了一個MV，

名為我不願讓你一個人。




－

聽這首歌時，

是一月三十日星期一凌晨十二時三十五分。




想起了很多事，

想起了很多字，

我不願讓你一個人，

歌詞很熟悉，

原來很多人都會說相同的話，

真的沒什麼特別，

分別只是在於說話對於某人來說的意義。




筆劃寫法一樣，

就是那點該死的意義讓人不能忘懷。




－










聽著聽著，

不自覺地微笑，

對啊，

微笑，

沒有了演戲的感覺，

勇敢地微笑。




閉上眼睛擁抱著自己的靈魂，

我最引以為傲的靈魂小姐，

仍然很優美，

很動人。




－




跟著歌詞輕輕地唱，

溫柔地唱，

送給大腦讚揚他的勇敢，

唱給小腦安撫她的傷痕，

又怕吵醒很不容易睡著的靈魂小姐，

親愛的同伴們，

我沒有讓你們自己一個人。




突然眼角泛起一絲熱暖，

諗起老豆近期成日打黎，

但我搞到自己好忙成日唔聽仲唔覆電話，

一黎大家同一日生日識左廿年我連呃你既力都費事用，

二黎真係唔想你擔心，

聽住你成日重覆同一條問題N次唔肯收線，

對唔住，

我同樣不會再讓你一個人，

而眼淚，

都唔會再陪我到永恆。



－



各位觀眾：

現在就殺我吧，

現在就吃我吧 :D

最純粹的孤獨

昨天又做了一整天的research，

最叻離題所以找尋了一連串與project無咩關係既資料，

再係圖書館見證利物浦繼上次踢走曼城再搞掂曼聯後，

決定要開始埋首fashion。




iphone突然閃出了一封新email，

presentation取消，

wise decision，

幾時都話我個course director好有料到。




隨便影印幾頁Vivienne Westwood後即刻執野鬆人，

好彩Royal Academy of Arts星期六延長展覽時間，

終於可以去睇David Hockney A Bigger Picture。




新project自定題目最終決定為繁華都市夜間的殘破與孤寂，

除了社會學城市發展學與人民地理學外，

Physically包括了聲音、燈光與Landscape，

本身對聲音已經十分敏感，

與朋友外出時常out focus偷聽人講野而且仲要聽得好清楚，

有組織有目的後更留神於生活中細微的聲音。



－

搭tube時有位年約五十既音樂人在列車內演奏小提琴，

見到佢支弓已經爛到疑似龍鬚糖狀，

配合佢個嬉皮士浪子外表又出奇地夾，

當時我食緊個好難食既Panini，

琴聲配上tube廣播、地鐵行駛聲音、零落鼓掌聲、群眾細語、係tube上隨便食個panini當飯聲再加上用現代輕便電子產品iphone錄，

混合一齊就係一條屬於倫敦既獨特soundtrack，

演奏完後音樂人與小孩一同高歌，

我為一段即興演出搭多左三個站，

同時我覺得倫敦地鐵終於貴得有道理。




早前睇過一本書講如何解構音樂，

音樂對我黎講係從生活細節轉化再合成既藝術，

所有音符以及樂器配合都有當中情緒與象徵，

而日常生活，

就係一段最直接有力既有機樂章。



－



當你除去一切阻礙用心去體會，

附近身邊的事物會變成高清，

就如近日所拍攝的照片，

燈光出乎意料地強烈及敏銳，

或許，

自己一個人擁抱最純粹既孤獨先可以真正張開眼睛專注地看世界。




風格轉新可能同近日換新相機有關，

我認為相機就如ipod一樣係有靈性，

就如我等車期間突然覺得好失落，

ipod會送給我一首今天應該很快樂，

而當你同相機溝通成為好朋友後，

而好彩地發現雙方個性相近時，

佢會成為你生活紀錄者。




－

其實應該如何定義現化代大都會？

研究大都市如New York、Paris、London期間，

突然在同一個書櫃找到了北韓與古巴，

前日看了一些有關城市學的書，

設定了大都市是經過一連串發展後已經被全球化的城市，

但其實沒有被捲入時代巨輪中的城市又為何被稱為發展中城市？

她們，

都只不過在做自己而已，

到底為何要用“現化代城市”的尺去量度別人的生活指數？




我早前認為，

北韓有自己的生存方式，

除去領導人令人驚慌的行為，

當地人民生活封閉貧困，

城市人將他們與自己的生活作比較，

都會覺得北韓人民很可憐想去救助，

但或許他們都只是在過自己的生活而他們覺得很快樂？

早前領導人去世，

很多人在Facebook笑說北韓人真可憐要假哭，

到底誰告訴你他們在假哭？

又到底誰告訴你他們不愛他們的領導人？

或許我們只是用自己的viewpoint去量度他們的行為吧。




或許有些變節者訴說內裡的慘況，

但我認為沒真正第一手資料，

還是不能妄下判斷。




就如當時跟朋友看世界盃時讚揚北韓足球隊很純真的在踢足球，

很真誠，

而且是有血有肉的，

同時我不能想像他們“被”解放後，

那純真熱情會如何變成金錢資本，

或許各個城市總有自己的生存方式。



－

夜班火車

密密做無停手，

今日睇足十本書，

唔知點解今個學期對表演藝術好有興趣，

其中一本書講所有人係現實中會不知不覺進入表演模式，

其實只要用腦諗過先講野，

已經算係台詞一種，

當你做戲做到自己唔覺得做戲時，

physically,mentally,emotionally完全投入角色時，

你就去到acting既最高境界complex acting。




我從來唔信唔戴con唔化妝就叫做自己呢回事，

當同係屋企既自己比較時，

到底咩叫做自己，

到底有幾多個人真係知道自己係點，

當人認為自己好自我好pure好true地做緊自己時，

已經係一種acting，

表演出懶係自我與眾不同，

當你唔知自己做緊咩既時候，

而覺得自己同世界格格不入，

演技未去到complex acting，

就會講一句：

我只係想做自己，

此為symbolised matrix，

you belong to a character and part of it is being "yourself"。




－




我最憎就係有人聲稱同人理性討論，

但其實係軟性強逼人認同以及讚好懶係inspiring，

就好似美國搞唔掂自己國內根本係抵死既經濟就去嘈中國血汗工場，

企圖用攻擊轉移視線懶係人道，

唔該讀多幾年書先同我拋書包，

真正了解一個理論係唔洗quote個學者名，

當你真係消化哂，

理論會係思想入面自然融合或排斥，

無需聲稱你同張五常好熟。




真諷刺，

位人兄仲叫我唔好讀死書要實質去做，

而你同我quote張五常三個字我已經知你實踐極有限，

去"feel"？

thanks，

you are so inspiring，

哦。




然後我問陳樹暉關於文革既事，

我一路睇住inbox一路覺得好感動，

當有人真心要答你同你理性討論，

而唔係要挑戰你證明你其實無料扮四條而佢好有料時，

你會覺得人生得一知己死而無憾。




－

十點離開學校，

上到tube時全個人散哂，

真係唔好彩有班酒鬼坐隔離，

雖然心知不妙，

但真係太懶無跟另一個女仔行去隔離車廂，

結果咪出事囉。



條酒鬼望住我，

用最後丁點氣力假笑say左聲hi，

然後佢向我吐口水，

okay，

突然無任何理性可言地大叫左一句fuck you，

唔止M到，

朋友話我積勞成疾，

下一個階段係積疾成怒，

我咁冷靜要面既人可以係tube大叫fuck you都可知已經攰到失控，

我演藝生涯內有幾可失控啊仆街，

fuck you。



酒鬼被朋友拉走左後，

好攰，

好想有個屬於我既膊頭，

但當我醒覺向左挨只會撞玻璃時，

只會怨自己做人點解要咁清醒。



由tube station行返屋企有五分鐘路程，

平常黎計係好安全，

但今晚friday night好多酒鬼，

真係太攰，

演繹唔到自己咩都唔怕，

體內最麻煩既不安感注滿全身所有細胞，

一路行一路覺得世界好危險，

覺得自己已經無能力保護自己，

有一秒真係覺得自己精神錯亂。



其實演技都係練返黎既，

搭多幾晚夜班火車瀨多幾次野，

慢慢就會發現，

其實無野好驚，

可惜就可惜在，

我真係已經無力再瀨野，

最慘係有心，

但已經無力。

二十一時五十八分 我仍然張開眼在呼吸

那寒冷的夜，

戴上耳機，

在街上遊盪，

世界就只剩下燈光在喧鬧，

還有無數微塵在空中遊走。



商店關了，

剩下那防盜燈在守護商品，

咖啡室關了，

剩下那雪櫃燈保持食物的新鮮與溫度，

手機訊號關了，

剩下那只會發光的打字機守護著內心僅有的一片寧靜。




－

你們的新年還好嗎？

我吃了個濃湯意粉，

看了集康熙來了，

拍了數十張照片，

聽了幾張新唱片，

上了一整天的課，

聊了很多無聊事，

閱讀了數本好書。



沒有特別，

一切如常。



一切如常，

對我來說已是接近完美的日子。




－

良久患上節日冷感症候群，

不在家的我們深明一件在香港沒機會學的事，

忽然高潮迭起歡天喜地後，

到底從中得到了什麼？

最終又會失去了什麼？



我不寂寞，

只覺得有點無聊。




－

然後，

我坐在床上邊聽演唱會邊打blog。



然後，

有點累。



然後，

我想睡。

狗咬狗

睇完段片，

第一個感覺係你邊位啊呀生？

你代表邊個？




聽聞四川大地震時，

有兩隻小狗救左一個老婆婆，

香港政府食君之祿擔君之憂，

我地呢班前殖民地遺留落黎既狗，

近年發揮人性的光輝養育左唔少新血，

什至偉大到連自己繁殖下一代都成問題。




有新血，

就自然有瘀血，

當儲夠足夠既新血，

就會發揮自己本能排斥瘀血。




香港知識型社會人民素質低落，

偷呃拐騙實在有欠氣度，

我本人都係香港被唔少知識份子呃過瀨過野，

最強例子一定係PCCW同3，

簡直係老屈神手，

年中全家俾佢呃埋屈埋夠過年去Four Seasons擺幾圍，

果種kill you softly既感覺真係會令人非常痛恨。




我地長期被虐就無咩所謂，

但人地一年先落黎一次去買隻金錶都被你明屈暗搶，

購物天堂變呃錢煉獄買隻錶都要挑機過十八關，

早排有個uncle去香港食碗牛腩河埋單三百五十蚊，

睇黎你地應該都係有好多苦衷，

睇黎你地都應該係走投無路架啦。

放少少水等你地食返餐飯，

人地搵開大錢，

唔旨在架啦，

但問題係你地竟然要用咁多計謀去搵雞水咁多，

搵錢唔洗用咁多腦，

原始社會搵錢大氣，

唔洗用黑旋風既，

直接用刀去斬你隻手靠搶就得，

國內親戚而家出街連銀包都唔敢帶，

一年內係街頭俾人搶左四部電話，

回歸左祖國應該去殖民地化，

諗計點去呃人買驅風油呢種資本主義只識得搵細錢實在唔要得。

－

係街睇度段片時突然間記起陳偉霆，

由佢出道第一日我已經形容佢為某種動物，

加上港人從來都唔記得佢係邊個，

盡忠職守娛樂左我地咁耐，

要狠狠地減壓形容返我係某種動物的話，

fair。

香港人真係唔好咁巴閉住，

你地都鬧人地係狗好多年，

人地都係講老實說話，

唔識普通話你話第時點搵食啊？

政府不嬲示範搵食要講普通話架啦，

唔識講，

第時點交稅都唔識，

交俾邊個你都唔知，

concept唔清點做狼？

注定做狗啦。




睇過下近年國內電視既人都知，

經典例子為神級"非誠勿擾"，

個個台都靠嘩眾取寵浮誇十倍搶收視架啦，

為生活姐，

why so serious?

狗口長不出象牙，

我本人就對象牙無咩desire，

你有需要？

你已經有？

嘩，

而家有象牙先搵到錢大把世界啊你，

我都係做返個安安份份講廣東話既香港人算。




孔先生話齋，

大家都係中國人，

本是同根生，

相煎何太急，

我地有法治，

一抽，

六四集會就有幾萬人，

睇黎你地都好快需要法治，

一抽，

六四集會先可以唔見幾萬人。




大家都係狗養的，

何必狗咬狗骨。

歡樂今宵

早排心情唔好聽過好多好多安慰說話，

講真我都唔知實際作用有幾多，

之前講過，

傷口其實唔太需要包紮，

要埋口同埋得靚唔靚都係靠自我修復能力，

今日有朋友打黎報料，

佢好明顯太了解我個腦思考模式決定曲線安慰我。




朋友唔係打黎叫我去食飯，

而係用三分鐘講一件荒誕離奇慘絕人寰八卦逸事，

我好少乖乖地聽哂成件事唔加把賤咀，

聽完足足笑左三十分鐘絕無呃鐘，

okay我無事啦，

快過打針勁過睇黃子華，

即刻請飲茶chinatown任食唔係講笑。




香港人真係最鍾意睇人仆街，

美酒當前理應把酒當歌人生幾可，

笑料當前更應放開一切塵世修養，

唔透露太多，

單憑個標頭“同年紀港男被逼婚”已經夠笑到我標眼水，

朋友話主角同佢傾訴時百感交集眼中浮現出男性患上某種疾病既悲涼，

看你偷泣的眼，

男人最痛真係算這種。

逼婚。




朋友話佢而家好苦惱，

我話佢唔係好苦惱應該點對應，

而係好苦惱點解自己要咁苦惱，

無得咁矛跳step咁快諗點算架，

細細個打Super Mario都有教啦，

要打死隻蜘蛛先可以去挑大佬機救公主，

現階段佢應該係諗到底點樣開始去諗點算，

諗得黎，

廿八三十都差唔多。




女人唔等得？

咁你都要嫁得先得架，

你又係夠膽架喎嫁個連諗都未開始諗既男仔，

聽到件事我都唔識俾反應，

因為連我都無諗到2012年同年紀人已經要開始面對咁迷幻既問題。




華麗挑戰令人生充滿Final Fantasy，

如果Mario唔洗打蜘蛛就可以媾到公主，

公主就只會係一個著住條粉紅色蓬蓬裙以為自己係公主既港女，

Mario就算係屋企都只會訓係梳化打機而唔會幫佢拍死隻蜘蛛。




Hmm...

可能公主會逼Mario買隻加菲貓黎做佢地隻BB順手拍蜘蛛卦，

你們的幸福咪就係咁之嘛，

真有福。




上天你都真係對我不薄啦，

娛樂新聞真係令我人生充滿意義。




從夢裡伊甸，

來到你枕邊，

夢與真之間，

就只差一寸。

陰公。










－




老老實實有時突然msn彈個唔知幾時delete左既人同你講好耐無chat都幾驚，

當然講兩句係完全無問題，

問題就係最憎有人一開波就問我而家讀緊咩啊？

問完之後話哦讀fashion咁正咪即係唔洗讀成日去玩？

哦你好多野做架定忙住去玩啊？

定係拍拖啊？

頂你個肺，

唔好將你本人無能強逼性套落我度，

恭喜你咁叻天才波唔洗讀，

而我好多野做好多野讀，

唔得閒同你講埋啲廢話，

足足浪費我十分鐘早餐時間，

我明白時間係會無力地白白流走，

但真係唔明好些人點樣做到個腦好似從未存在與運作，

有時真係要相信下自己以前專業判斷，

delete左，

就係delete左。

找blog數

話說真係好耐之前拎左朋友盒chanel眼影，

今日著綠色冷衫諗起盒綠色眼影先記得要做review，

唔好意思，

希望你無俾人追數，

而家即刻找數。

今日全妝用具圖，

平常睇開我xanga應該知我係Giorgio Armani Face Fabric超級粉絲，

但Face Fabric係類似BB cream平時返學貪方便可以用手上，

唔好意思係零控油功能，

近日返學時間實在太長，

早兩日係學校全個妝好似浸過水咁變紅，

當日決定用tissue將所有粉底抹哂再用僅有既YSL touche eclat highlighter重新上哂全面，

效果出奇地好，

第二日即去YSL買埋支內置粉底掃既perfect touch radiance foundation。

首先用神級補濕而且萬年用唔哂既laura mercier hydrating primer，

上foundation再用YSL radiance-enhancing pressed powder定妝。

返完全日full day仲要搵人食飯時，

因為內置粉底掃所以簡單地係廁所都可以重新上妝，

個掃夠大毛質比Armani粉底掃靚，

粉底遮瑕度好高唔洗再用遮瑕膏，

壞處係佢不必要地好大支，

同埋我真心認為支掃無得洗。

早兩日有人問我點洗掃，

其實你地問心唔污糟到完全用唔到都唔會洗架啦，

衛生？

算吧啦你。

（但我真係到走投無路會用洗頭水護髮素洗掃。）




今日返學落雨，

加上早兩日訓得唔好係咁爆油，

返學五個鐘後油係浮上粉面而唔係將粉融哂，

之前用過chanel、giorgio armani、bobbi brown，

但YSL係我用過唯一一隻油會浮係粉面既粉底。



－

望到隻眼同個頭頹到咁都知我好攰，

唔好意思用個殘妝做review，

如上段所講七個鐘後返到屋企影相時foundation仍然係毫無變化，

油只係好似水點咁浮係面，

用面紙印一印就保持到乾爽霧面，

唔好意思我唔係靚女，

我只係為左呃免費眼影而打review唔係存心要做beauty blogger唔洗擔心。




－

眼妝係朋友叫我試用既Chanel Les 4 Ombres 20 Regard Perle，

近日中天與地毒好鍾意佘詩曼個超級smokey eye，

所以將Chanel金屬墨綠主色混GG金藍色試圖做個輕口味rocker，

先用上圖Giorgio Armani Eyes To Kill cream shadow一號金藍色將全個眼窩打底，

cream shadow可以令粉狀眼影更出色持久，

之後用下圖chanel四色shadow左上角主色寶石綠上眼摺位同下眼線位，

我自己會加黑色MAC霧面眼線因為唔會搶走個寶石綠，

最後上chanel黑過marker既mascara。




比較清晰色圖如下：

－

由於眼影比較重口味，

所以胭脂同唇膏唔可以用重色，

blush我用Giorgio Armani 5號啡色再加少量Chanel 82 Reflex玫瑰紅有返啲血色，

唇膏係Giorgio Armani 101號偏啡裸色，

都係強烈推介YSL個top secret lip balm，

佢功能係好似平時上粉底前既primer，

上左之後一分鐘個咀會好smooth好易上唇膏。






P.S.

rock到爆銀色指甲油加westwood金盔甲戒指，

墨綠色vintage超級oversized chunky冷衫，

灰金白色American Apparel clutch，

返到LCF個個見到銀色指甲都尖叫，

指甲油來自American Apparel Metallic Sliver Jazz：






係啊你無睇錯，

AA減價好似係六鎊既指甲油竟然係好好用，

上左一層就已經有上圖痴錫紙效果。

－

唔知幾時開始有某種陰影，

出親街都覺得會突然撞到熟人，

長久下去一刻都唔敢鬆懈，

或者可能係好事，

反正即使上足一日堂，

無人會想俾人見到自己頹廢一面，

要扮，

就要型到盡。

鋼鐵又再一次煉成

今朝一起身就跌入薯片深淵，

當你係london college of fashion學生，

食薯片簡直係罪孽深重，

如果你唔係讀LCF，

而我話俾你聽食薯片對我黎講已經叫做自暴自棄時，

你地真係唔洗再非常認真地叫我走出情傷，

因為我眼中所謂終極自我放棄，

都只不過係食薯片做早餐。




當我一路食薯片一路睇康熙來了，

腦海忽然浮現輕功水上飄少林足球六師弟，

愈諗愈心寒再拎起塊鏡望望，

油頭臉腫眼浮浮仲有幾粒暗瘡，

心頭一震都係乖乖地去洗臉化妝然後請Flatmate食薯片。




積極振作做人第一步最緊要靚，

唔好再同我講咩偽裝定化妝，

男人頹叫男人味，

女人頹叫訓醒未。




用心化個靚妝，

行出街鬼知你喊過笑過傷過痛過，

如果可以連自己都呃埋，

距離正式成為一個成功港女之日不遠矣，

港女修煉，

最緊要畫完條眼線出街抬起頭大步向前行路有風。




－

猶如沉沉大病一場，

痊癒了面相更閃亮，

無論命運點樣曲折離奇，

噴兩下Chanel香水，

無人可以恐嚇到你做人沒趣味。

化完個天與地血腥Hazel妝殺氣重現，

雖然眼內仲有少量血絲，

返到學校朋友話我look amazing，

我不嬲化完妝都look amazing，

用支黑過marker既眼線筆都唔amazing我仲出黎LCF行。



－































女強人唔敢當，

由其只係情愛小事我都唔好意思用女強人三個字，

姊妹今朝話要幫我開個fan page，

未有足夠把握暫無打算進一步羞辱自己，

暫時未有多餘心理準備摧毀內心另一片港女的驕傲，

但我會欣然接受你地一切表揚與讚賞。



－



今日係tube睇23 things they don't tell you about capitalism，

朋友話我仍然受情傷所困開始有反社會情意結，

資本主義自由市場，

個人利益被無限放大，

無論你用咩方法搵到錢就係屬於你，

無咩責任去理其他人生死存亡。

小女子近日被情所困無咩出息，

套入愛情黎計，

當你聲稱自己咩都無所謂，

大膽到同對方講無任何限制，

對方係認真地只會諗自己如何係你身上得到最大利益，

無得怪人地，

各取所需姐，

自由市場啊嘛，

又係你自己講既，

算啦，

學煉鋼就要交學費。

那些你很冒險的夢

琴日勉強返學時沿路一直聽周柏豪，

第一次真係落足心機聽，

除左今天應該很快樂講夢想，

仲有一首只有一事不成全你，

除去為患病友人默默生火，

可以自行對號入座斷章取義。

鬥志軟弱無力無嘗不可，

任由平時點理性都好，

今次真係放肆傷春悲秋，

難得有得任性野蠻借題發揮，

食得唔好嘥。

意外地周柏豪發放大量正面能量，

唯一一首我skip既係smiley face，

聽smiley face真係無可能笑得出，

世界上無唯一一個快樂原因，

等唔到就真係唔好再等。

－

今日收到新diary，

2012，

早前講過世界末日只係人類意識層面上終結沉睡，

來年將會係另一個瑪雅年曆新Cycle開始，

人類意識開始甦醒，

重新思考現行生活模式。

2012一黎我就整鋪勁既，

自我獨立意識應該即將重新啟動，

正如我上年同大上年咁講，

今年應該會無咁黑。

朋友岩岩話我夠膽去衝已經好勁，

唔係人人都做到，

但我個人覺得幾可惜，

一鋪過撞到咁傷，

可能以後用自保做大前提，

再無心口得個勇字向前衝既sherry。

天與地Uncle Dylan話：

有種人你用盡方法都唔會想佢改變。

講真雖然今次汲取大量教訓，

但我有預感下次都係會不顧自己死活衝左再算，

唉SherrySherry，

總是學不會，

再聰明一點。

－

好掛住香港，

八個時區，

隔兩行字，

如果聖誕認命返左香港，

可能所有野又完全唔同，

或者，

只會撞入另一個更攞命既災難。

天與地，

一念天堂，

一念地獄，

自己揀得，

就要承受。

反正都係廿歲，

仲有青春，

唔好認輸。

唔好認輸，

唔知邊個岩岩先喊到癲婆咁，

唉楊麗珊!!!

沒有下次

早前無感受過那誰真正威力，

都係靠回憶叫做係咁而代入下，

今次親身感受真係完全兩回事，

完全將那誰功力發揮得淋漓盡致。




唔止how to forget someone，

最緊要係how to delete someone。




delete email，

delete 電話，

delete Whatsapp，

delete Skype，

delete history，

一路喊一路delete，

理性delete感性反抗，

原來delete野好攰，

一個鐘就好似做左一個月苦工，

岩岩唔小心連篇文都delete埋，

其實心底最想delete應該係我本人。




上一秒求自己留返少少，

下一秒逼自己開機delete，

當你發現一個陌生人竟然係你生活中無處不在，

非常攻擊性地佔據你日常生活每個細節，

毫無預警地徹底摧毀一切以及所有，

而你又唔知幾時開始放任俾人咁樣侵佔你既生活，

唔係心痛，

係心寒。



我唔識憎人，

唔識怪人，

唔識怨懟，

頂多咪又咩都自己攬上身，

無人逼我，

心甘情願，

我做得就預左個後果架啦。

今朝有朋友打黎問我點，

好冷靜咁敍述一個鐘內點樣delete哂所有野，

就好似一個殺人犯有意識清醒地講返自己殺人經過，

完全冷血毫無情感可言，

好似件事唔關自己事，

我無喊，

結果係我朋友喊。




佢問我做咩對自己咁殘忍，

有時真係唔洗凡事去到咁盡，

留返個空間俾自己抖下氣，

刀係可以慢慢拔，

一次過拔哂咁多把會失血過多，

會死。




死？

我無野喎，

邊有咁易死，

小事啦，

不嬲做咩都去到盡，

做決定之前係預埋個後果，

責任都係要自己負。




我學野好快姐，

之前你地仲個個擔心我太理性攬哂上身會爆，

而家我爆啦，

又話太狼死太殘忍，

崩潰對於楊麗珊黎講咁難學我都識啦，

我諗康復都唔係好難學姐。




放心喎，

我唔係想扮可憐搏同情，

放得上Facebook就即係delete左佢啦，

Xanga無delete證明我未去到喪心病狂，

開個新姐，

所有錯誤係邊度開始咪係邊度終結囉，

其實崩潰都唔係你地所講咁難係我身上發生姐，

第一次試其實都幾爽，

當買個教訓學下野囉。

我唔識好似妹妹仔咁呼天搶地求人唔好離開，

"求"對Sherry Yeung黎講係根本性地政治不正確，

楊麗珊從來無資格做感性行先既傻事，

所以咪接受囉。

愛都識囉，

傷都識囉，

學埋放手囉。

Forgive yourself，

還掂，

都無下次。