咦又生日啦？

咦，原來又十二月一號，又生日啦？


其實生得日多都悶啦，年年活動差唔多又咪食餐飯食蛋糕，大一歲之嘛，有咩值得一班人去劈酒唱K。Oh well，咁劈K又真係唔洗原因既，有原因就理直氣壯啲咁囉，我經常覺得“生日玩鋪勁”係世界其中一個最廢最能證明世界悲涼既去玩理由，出世都幾廿年前，又唔係耶穌佛祖孔子，sherry誕？真係who fuckin' cares。對上一次劈K都幾年前啊唔知邊個生日，當時都仲係小妹妹，劈完之後鬼記得邊個生日，邊個仆街走數，邊個找數包底就記得。我就記得自己飲極唔醉，仲要送人返屋企，自己明明住倫敦仲要跟車返Hatfield，差啲俾人嘔到一身都係，第二朝hangover搭個幾鐘火車返屋企好凍之外，都已經無留下其餘記憶。而家好似好大個，hea下hea下就發覺實情都唔知有咩好慶祝，我要去玩就唔洗生日都會去玩，做咩係都要生日先可以去玩又到底有幾多人真係為你幾廿年前既誕生感到認真興奮？算吧啦，都係搵個藉口買下禮物扮下好朋友咁姐。






我都唔知點解，近年完全冷漠對待任何節日除左聖誕節，因為聖誕節有聖誕老人聖誕樹，同可以買一堆廢物。今年生日一黎可能仲做緊essay，二黎又不停send CV搵internship。生日有咩做？我都唔知喎，生日一定有野做架咩？勉強搵啲野做咪出街睇下聖誕樹啊食下飯咁囉，當然我就一定寧願死係屋企睇Grace Coddington本biography聽魏如萱演唱會架啦。大佬你地香港廿幾三十度，倫敦落雪啦你地廿度就大驚小怪戴頸巾。記得幾年前係香港同前男友過聖誕，啊男友話好凍攬住我懶係man咁，當時只係心諗：「Shit，好熱啊，放開我好無。」我覺得香港人話香港凍只係佢地未見識過外面個世界到底有幾凍，又或者，咁冬天嘛，明明唔凍既，你講下我又講下，咪見凍囉。


睇聖誕樹都係其次，最緊要都係放相上instagram，望望下覺得自己個instagram可以當做part of my portfolio，唔係自大，啲相真係好靚。慢慢又悟出科技又去左另一個朝代，Facebook呃like呃黎呃去都係自己友，但instagram呃like可以進軍世界放眼宇宙，全球九唔搭八既人都可以like。每次開instagram，見到一分鐘10likes，三分鐘35likes，十五分鐘45likes，確實又係一門勾引上癮神功，最後，又沈溺虛擬世界做無臉名人。我都係好後期先發覺自己有意無意當自己係名人，要向全世界宣佈小妹近日用緊Chanel支Chance香水，加一兩句廢話企圖access全世界，簡稱世界女化，無左種facebook僅餘既型格。潑出去既水當然收唔返，無意當左自己係世界公民之後，咪只好繼續沈溺。又好似前排經常係facebook見到一個人有意無意話自己好靚仔，好多人like足以見證世界到底有幾客套，又或者係世界審美觀今時唔同往日，我唔睇樣，單憑佢個-v-表情符號，已經想講一句：收皮啦柒頭。


其實Andy Warhol有好多名言既唔止得一個十五分鐘fame theory，佢都曾經話過consumerism其中一點引人入勝在於一支可樂就係一支可樂，不少於一支可樂同樣唔會多於一支可樂。用silk screen無限reprint n次，幅畫入面，都只係同一支可樂。Elizabeth Taylor飲既可樂同我地呢啲平民老百姓飲既都係同一支可樂。於是，就產生celebraties商品效應，我地做唔到Elizabeth Taylor，但可以飲Elizabeth Taylor支可樂。所以我發現，無論一個生日幾咁memoriable都好，其實，又咪只係another typical day，唔會因為你覺得懶係感動又懶係賦予件事無限意義而變種成為另一件事，世界仍然如常運作。加上，都係唔好自我澎脹啦，you are just another ordinary human，即使幾多人話you are special，but you are just another typical girl on earth。再者，12月1日就係12月1日，唔會因為你生日，或者好多人幫你慶祝生日而變左一千零一日。我知我今日好黑暗好重口味，無計啦，趕功課啊嘛。


又話時話我學校早排有Grace Coddington同Victoria Beckham做guest lecturer，哈哈哈，got any grapes?

港式街燈晚餐情意結

話說早排病得好緊要，有賴朋友們照顧啦，足足做左兩個禮拜廢人，仲嘆過係屋企，但大前提係已經幾年未試過病成咁。屋企啊媽彩我都傻，由得我自生自滅，Flatmate話啊媽一定同我好熟，佢既做法完全係示範之作，因為人地一邊照顧我，我多數一路反抗。叫我食粥我要食意粉，叫我食意粉我又要食公仔通心粉，麻撚煩煩咁，所以由得我去死就岩。三餐一宿，有埋藥食，但其實係因為啲藥先病咁耐都好唔返，最後決定做返自己，唔食藥兩日就好返都話左架啦，有時我唔聽話係有我道理既。


病重時打電話返屋企，努力忍住唔咳，講一堆廢話進入扮無事mode，老豆明顯知我玩野。而一個禮拜後打返去已經為時已晚，基本上屋企已經開得海味鋪。啊媽一路講，一路話啊老豆有幾錫我，由於當時Margiela上腦，一路聽一路覺得.....其實我physically都無得救架啦，不如用花膠條數俾我買個正版Margiela Clutch.....精神傷害大過身體傷害，醫心靈創傷緊要啲啊。難得我會計數，條數應該好重要，靜默左幾分鐘啊媽問：「Skype斷左線咩？」我自言自語話：「嘩..花膠條數可以買到個Margiela酒紅Clutch唔洗買H&M版MMM啦，燕窩數可以買到Balenciaga啦...兩條數加埋咪夠買Tom Ford，最多咪無骨膠原唔會死既。花旗蔘，最多咪少啲中氣囉還掂我霸氣搭救，嘩仲可以買MiuMiu好靚啊....」啊媽話：「你個衰女，人地一番心血買俾你補身，你細個老豆儲錢俾你兩隻衰野去外國讀書自己邊捨得買黎食，而家特登去買成日掛住手袋，有無讀書架你究竟，真係無人性。」


我發覺，女人買起野上黎，有時真係好無人性。


情況就如男人咸片上腦，女人會適時手袋上腦。


曾經用手袋上腦theory同老豆解釋，讀時裝真係會搵到錢，再用case study令佢更practical地理解成個理論，當日我又屈佢張卡去YSL買化妝品，佢即刻好深刻地理解，讀fashion好搵過做iBanker。


我對食真係無咩要求，食唔死唔會中毒即可，但當然我經常挑戰人體極限試新菜，真係最恐怖係咖哩芒果雞肉飯、朱古力汁蘋果牛肩，真係好食架。老豆成日唔知帶我地去邊食好，當然最好都係留係屋企食啦，但有時佢想出去食飯時，唔知係咪上一輩都有無限loop情意結，黎黎去去都只會去三四間風雨不改。


我屋企飯堂有：尖東太平館、流浮山霸氣老闆娘、尖沙咀Marco's結他叔叔、九龍城茶記、廟街街口、義順牛奶公司以及西貢全記大細uncle。真係全部都有返咁上下輩份，睇住我同細佬兩隻野大，去親都會摸摸我地個頭話大個仔大個女啦。其實上一代人情味唔單止係食店有返咁上下歷史，而係上一輩真係食開一間就到世界末日都唔會轉。而人情味係當你忘情亂9咁叫時，佢地會幫你cut單，叫你：「叫咁多食鬼到哂咩你，食住先啦。」每次聽到我就會覺得佢地真係同我老豆好friend，加上每次食親都一定係好野，從來唔會失手。然後慢慢會發現，年輕一輩餐餐都要新餐廳，eat-pay-go，基本上唔會去下次，就算有下次，到門口時都會發覺：「咦，執左既？」無限新鮮感，但好難會記得某一種特定味道。


尖東太平館係我屋企慶祝飯堂，生日啊升中六啊都係太平館食瑞士汁牛河，佢隻瑞士汁唔知點解真係第二度食唔到。每次係第二間茶記食牛河都會諗同太平館有咩唔同，久而久之就無再係第二啲餐廳食牛河，情況就好似睇Radiohead，睇完神級表演後，其他，都只係浮雲。流浮山就食打冷啦，斑頭腩即係油泡石班腩、蜜糖雞翼、豉汁蟶子，霸氣惹味系列好食到癲。老闆娘極之豪爽，成日鬧我老豆叫咁多嘥料，基本上係完全唔聽我老豆講野自己落單，就住我地一家四口食到幾多就落幾多，就住當日有咩新鮮就俾咩我地食，永無失手。


廟街街口打冷無得輸啦唔講啦，義順就因為老豆睇唔過眼澳洲牛奶公司明明唔好食又咁牙擦，所以永遠都會去隔離義順食雙皮奶，老豆真係好有型。其實義順呢，真係好食啲又無咁趕既。九龍城茶記燒味真係天下無敵，但睇佢個勢三間鋪變兩間，兩間而家變一間都大限將至，所以就算佢加到五十幾蚊一個燒味飯，我地都去支持，希望唔好咁快執啦，唔想食大家樂啊大佬。西貢全記岩岩開時唔出名架，係後來TVB效應先要訂位。細個Sherry妹好鍾意食上湯龍蝦，大細uncle好錫我次次去親都俾隻最大既我，而我呢........真係夠膽自己食哂架，後尾大uncle因為某些事啦所以永遠唔可以落床，細uncle自己一個撐起三間鋪。而家我去食，都仲會揀最大隻俾我，可能細個食哂啲Quota啦，已經唔多鍾意食。但每次去，仍然會食哂全碟，uncle加油啦你上鏡真係幾靚仔，有啲似黃金寶。


尖咀Marco's係平安夜飯堂，除左一年我無返香港之外，已經連續食左五年平安夜聖誕餐。好食唔係特別好食，聖誕餐十年如一日，龍蝦湯明顯係金寶湯，一舊食左都唔覺眼既鵝肝，一塊唔太好食既angus steak，仲有一個心太軟。唔好食，但內裡好似芬蘭小木屋有啲好crappy既聖誕裝飾好溫暖，而且有個uncle永遠被忽視地係一角彈結他。佢知我有聽，走黎問我鍾意聽咩，我話何韻詩啦！仲記得當時岩岩分手，佢係我身邊自彈自唱「我找到了」，即刻真係眼濕濕，放心啦uncle，第時我搵到之後，帶埋老公仔女黎聽你唱歌啦，你要繼續唱，真係有人聽架雖然唔好聽。


而最緊要，都係同屋企人去食。


今個聖誕又去Marco's啦，記住訂位啊老豆。

他和她分開後的第九夜

與朋友談起分手經歷，最難捱的通常是第九夜。頭七有兩種，一種是哭斷腸，另一種是自由爽歪歪。第八天開始有點心癢，第九天有點不安，第九夜開始感到寂寞。分手後第九夜，由於過了頭七，朋友們的chill out quota也理應用完，慢慢他、她又回復一個人的單身生活。一切天翻地覆也該完了，過了許久的雙人生活，其實真的忘了如何正常地一個人好好生存。夜裡默數，原來還差一天就分開十天了。糾纏一大段年月後，癲狂一星期就會開始想念平靜，想念那曾經躺在床上與他或她輕快地閒聊，天南地北，風花雪月。由單位數過渡至雙位數，那是一個難熬的關口。因為心知肚明，一但去到雙位數，接下來就將有另外八十九夜孤單的夜晚。而又因八十九非常遙遠，數著數著，大概數到二十一、二十二、慢慢就忘了繼續數，二十三、二十四、忘了。







他的第九夜想起了曾經愛過的那個她，然後暗自打開Facebook，追蹤她的生活。我好奇地問男生也會關心並追查女生的下落嗎？不是最討厭女生監控嗎？我以為只有女孩有這些逼到絕路的心思。他說：「會，只是妳們都不會知道。」我說：「啊，女生是要清晰的讓男生知道我們在監控他們，監控是其次，讓男方生活有自己存在才是重點。」他說：「男生是純粹想知道女生的下落。」他說起了那時分手做過的事，check facebook、先登出再開一個新的xanga account偷看女生的日記、偷看女生的msn有沒有上線、什至看她密友的facebook，以防錯過半點女生的生活。聽了以後感到十分驚訝，從不知道男生能如此細膩去關注一個人，也許是我的前男友們沒有讓我知道過吧。又或者，根本是女生們心思只放在男生的壞，企圖讓他們變成心目中的最好，卻從沒留意男生們對自己的細緻。而放在我身上，其實也只是我的粗心大意是但求其。



我問：「那想她，為何不找她？」


他說：「那是一時寂寞，還未肯定是愛還是依賴。為免一錯再錯，倒不如辛苦點多捱一會看情況如何，偷偷的看一下，能減去半點不安也就好了。」



而我的第九夜嗎？因為他沒找我，所以我把一切能在他眼前出現的social network都關掉了。我以為，完全消失之後，他就會來找我。所以我把facebook廢掉，MSN顯示為隱形，xanga也沒再打了。



漸漸，我們失去了聯絡。


我以為他不會再找我了，慢慢回復了正常的生活。


他以為我已完全康復，也就沒有再打擾了。


過了最難熬的第九夜後，他和她，暗地裡，慢慢把對方收起了。


過了良久，他和她談起了那時的第九夜。但那已不再是MSN，而是Whatsapp了。突然發現一覺醒來，已是另一個朝代。默然地發現雙方仍為當初的無痛別離耿耿於懷，他認為她沒有他過得更快樂，她認為他並沒有在乎她。突然，默默地在另一個時代冰釋前嫌。冰釋過後，發覺大家都成長了許多，這些年以來，已變成了陌生人。


冰釋過後，我們，都不再是朋友了。


一切，已經過去了。


我們，都不再是那個他和她。


聊天過後沒再找對方，又再過起自己的理想生活了。

關於禮物，我想說的是…

說起禮物這回事，我還真是號令人頭痛的麻煩人物。大前提係因為我個outlook似係生活上應有盡有，而且為人比較怕麻煩，故有物質需要就會自行了斷。有時我會好佩服香港女仔用大量心機去哄男友買野，香港社會金錢等於時間的話，我覺得佢地付出既時間心血係絕對值得獲取一個LV。而我為人比較隨意率性即係懶，用錢可以解決到既問題唔會為自己製造麻煩，而且絕唔會為資本主義苦苦低聲下氣浪費時間尊嚴。一黎，受人錢財欠人一世，綁手綁腳I just don't like it。第二，小妹購買樂趣在於：行街－中伏－腦交戰－中伏－俾錢－用。如果無左實際用之前既樂趣，基本上買野無左70%歡愉。


Lana Del Rey話We were born to die，還掂終須一死，錢財都真係身外物。洗錢除左實際維持生命，不外乎係人生一種尋開心既玩意。岩岩睇英國藝術雜誌Adbusters，第三頁就大大隻字寫住“capitalism is the only operating system we got, and it's not gonna get an update anytime soon.”，我既謬論係so why not just enjoy your life。由此，琴日用份微薄人工買左幾件H&M x MMM。而我地既分別係，你班傻仔去排幾日隊，我地訓到十二點再hea hea地上網買，朋友直頭三點幾先去H&M行個圈。同時都唔係因為件皮褸係Margiela先買，如果係街見到件咁型既褸都係會買，當然加左Margiela個名，market value無限提升，為著個白色數字解構主義label我又唔介意俾多少少錢，俾MMM完美解構，做MMM下亡魂。


名牌唔係要黎折磨自己，that's not what luxury means，名牌係要用錢買“media上好似”比較舒服既人生，所以洗錢都係luxury package其中一項，洗錢洗得舒舒服服都係kind of一種luxury。That's why我覺得著100吋high heels整斷自己對腳、為著衫減肥減到厭食症、為買件衫一個禮拜唔搭車唔食飯都係俾資本主義過份洗腦既傻仔。又如果你話俾我聽訓三日街先含辛茹苦買到一件H&M x MMM的話，我只會係背後指住你班on9仔笑，而你著起上黎，都型極有限，係道氣質問題。而又當然，香港係永遠唔會識個嘆字點寫，算吧啦，任你著全身chanel都只係一個港版tries too hard既chanel。最驚堆香港型人全身黑色chok哂串樣，well，comfortable about yourself先真正浪漫有型，都係果句啦，香港真係買件衫出個街都辛苦過人。當全世界99%人都係slave of capitalism時，點樣於capitalism中活出自己態度先係重點。


朋友們要送禮物俾我好難敷衍了事，要用心機搭救。當然我又唔係咁大牌，基本上係叫人唔好送禮物，要到送禮物咁friend既地步不如出黎食餐飯仲好啦，又可以見到你，你又唔洗煩，win-win situation。收過最出奇制勝既禮物係用7-11膠袋做花紙既melty kiss、農曆通勝，okay我完全地受落，禮物本身唔係最重要，最重要係收到覺得開心，唔止我開心，係大家都開心，笑兩笑圍威喂咪幾實際。中三時收過best friend D一朵新鮮玫瑰花，成為當年gift of the year，又收過前男友手製唇膏、演唱會DVD、中六好友手製相簿等。


前日收到G送一本三歲法文生字圖書連iPhone畫筆一支，即時打電話問點解我要無啦啦學法文，佢話純粹係pageone見到本書好sherry就上amazon訂去我屋企，而廿歲sherry妹就因為一本幾鎊既兒童圖書、無聊粉紅色畫筆開心左一日。隨意是但，生活上無啦啦記起一個人，然後shop and give，that's what a gift means。而又岩岩收到朋友J親手製作星型銀鏈一條，thanks a lot。哈哈哈，可能我為人疑似好難取悅啦，唔鍾意時真係don't give a shit，所以各位肯為我花心機心思，btw，多謝你地認為我係一個值得花時間心血既死港女。嘿嘿，我真係等緊我個生日蛋糕架。


近日適逢project deadline，極度迷戀instagram與Lana Del Rey，shit，we were all born to die。


http://instagram.com/sherry1201 - Feel free to follow.

販賣愛情－Chien-Chi Chang越南出口新娘攝影集

今日仍然病得非常重，食藥之後一直訓有人黎裝新water boiler先勉強起身，而當時已經三點幾。一起身就開youtube睇《圍城－天水圍的故事》，睇慣黑色電影，但呢套的確真實到心寒，scene by scene完全無透氣喘息位，最後太重口味關係無睇哂全套就熄左。然後繼續睇相集，最近意外發現一位台灣紀實攝影師Chien-Chi Chang。官網中《紐約唐人街異鄉系列》、《北韓變節者系列》都極具震撼力，但最令我睇得著迷係《Double Happiness》，亦即《越南出口新娘系列》。

上圖為攝影師到越南實地紀錄拍攝，當時一名台灣男人正於婚姻仲介所「挑選」未來妻子。自己對黑白攝影有著大程度迷戀，當中黑白光暗對比度令照片中敍事張力增強，而且令主題清晰減低由其他色彩帶來不同程度上干擾，強逼讀者集中焦點面對相中故事，而非一直研究無關痛癢之事。黑白同時直接地將出現實社會中無力、無情、荒謬、赤裸與不安完全放上檯面，抗絕以色彩粉飾太平。粉色少女成資本主義社會下亡魂，大紅雙囍只能成現代黑色幽默，認了吧，世界正在死去，又什或根本已經死去。彷彿生活於現實的我們，只能眼睜睜看著世界上荒謬與荒涼不停滾動，無力阻止，無力抵抗。

法國新浪潮電影以妓女象徵資本主義的荒謬，愛情性慾被物化，明刀明槍的以金錢交易。現實社會中，愛只能成為一種以溫暖為名的販賣單位，再以肉體作為實體單位放於市場上買賣。上圖只感覺到她們那種赤裸不安，情況比被帶返警署的妓女更為裸露，因為妓女在某些情況下的確是觸犯法例，而她們其實沒有做過什麼，就只能赤裸地被無情檢視，如貨物般被評頭品足。或許她們也犯了罪，於資本主義社會中，窮，是一種原罪。做了一下research，有些女孩是自願嫁到外地，因為當地男人太懶太窮，並不會得到幸福。而幸福在生活線上，只好以條件作量度單位。有些則因為家庭太窮，往外嫁會得到一筆禮金，以安頓父母。一篇報道中，寫道 all-in price for a seven-day trip to look for a wife in Vietnam is about CNY36,000 (US$5,671)。五千多元美金，經中介拆上拆，還有機票、交通費、等等等等，其實也所餘無幾。五千多元，就販賣了自己的一生。五千多元，就足夠買一個女孩的一生。

“Vietnamese brides are obedient and will never run away unless they are beaten.”－節錄自其中一間婚姻仲介所的宣傳稿。如果要以「被打」作為逃走定義的話，請想一下，她們到底將會得到什麼待遇。此情況讓我想起了TVB爛劇《名媛望族》中，楊怡本為有錢人家用錢買回來的妹仔，而在劇中，那老頭一句「我用錢買你返黎」終結了女方的所有抵抗，你是資方買方，我是被買的那一方，你是上級，我是下級，一切多說也只是多餘。另一家仲介所老闆介紹服務時說“I guarantee that within seven days you can bring your bride home. All customers seeking wives via my company have been fully satisfied. Vietnamese brides are very obedient and will not disappoint you.” 聖經中傳說上帝用六日創造世界，好讓人類在第七天以後享受最美好的生活環境，而現在人類在美好世界以七天時間交收愛情，此事是有多麼的諷刺。而看著另一個「交友網站」介紹越南女孩的膚色、髮色、眼睛均為能被欣賞的販賣本錢，而性格態度更是一大賣點。原來作為一個好老婆，必定要「溫柔」與「聽話」，又令我想起了《春嬌與志明》中Brenda與春嬌到北京公園搵老公。有錢有事業的，可以用作等價交換，沒錢沒事業的，只能以自身條件作為market value，世界還真公平。

另一令我震撼的youtube片中，啊媽帶個仔去「買老婆」。情況又如《春嬌與志明》中，北京公園啊媽幫個仔擺檔，而他們還「比較」沒那麼荒謬，始終Brenda要跟黃曉明先見面，兩個一見鍾情才能成為情侶。但片中婚姻買賣途中，雙方即使面對面仍然要透過仲介溝通，simply買與賣，情況猶如去街市買菜只需要同賣菜姨姨聊天，並不需要與那棵菜溝通。七天時間見面、擺酒、簽紙、申請移民、送上門一條龍服務，仲介亦都表明只負責女孩是否健康、是否處女，如果婚姻出現任何問題恕不負責。而一個毫無依靠被「買斷」的異鄉人如何維生？當初她們以什麼條件來訪，最後也只好用當初的本錢賴以為生。


官方介紹短片：

http://www.magnumphotos.com/C.aspx?VP3=CMS3&VF=MAGO31_4&VBID=2K1HZOZPCZRK6&IID=2K1HRGT50BS&PN=5


Source : Chien-Chi Chang官方網頁


題外話：

剛發現一首非常動聽的新人新歌，艾怡良的《在我愛你之前》，有點A-lin有點Joanna Wang又有點蔡健雅，還需要時間站穩陣腳吧。蔡旻佑負責作曲填詞，難怪如此熟悉。「我的幸福太渺小，不需要擁抱，輕輕的聽你呼吸，誠實的說給你聽。在我愛你之前加一個逗號，愛你之前應該先準備好，你知不知道，不是愛你說說就好。在我愛你之前加一個問號，想聽你說我能讓你依靠，別讓我在說我愛你之前，加上句號。」在youtube中還未找到試聽版本，先聽主打歌《如果你愛我》吧。

Until the end of the world ...

早排行Gallery時，一名意大利人坐隔離順便傾下計，傾傾下計佢問我係唔係Sagittarius，我好奇地佢點解會知，而佢只simply一句you act like a Sagittarius。就此話題研究一下身邊人馬，其中一位同年同月同日生有個拍拖N年男朋友近排訂埋婚，同月同日老豆都大大話話結左廿幾年婚仲間唔中同呀媽耍花槍。（題外話，早排適逢車仔對死獌狗，打個電話返屋企，佢兩個仍然好似十幾歲細路鬥咀，你一句死爛車，佢一句死獌狗。當時覺得結左廿幾年婚仲有閒情睇波鬥咀的話，的確係幾生修來既福份。）另外幾位人馬朋友們都分別有拍拖良久好男友，well基本上只有我一個仍然忠於射手座精神自由自在，我諗咁就係意大利人口中既act like a Sagittarius卦。


一直唔明自由兩個字應該點定義，用於我身上的話我只可以話自己不拘小節，是但求其，鍾意獨處。Flatemates係living room吹水時，多數留係房睇雜誌，人人去clubbing時，又鍾意留係屋企打Blog，成屋都係人時，得我一個從來唔帶人返屋企。Flatmate H話呢啲唔係叫做獨立，係叫自私自我中心，唔鍾意同人share。非常誠實地說，我好怕人地破壞我生活。係街外做咩都好，返到屋企就係屬於私人時間，間房係屬於我，唔鍾意有人破壞屬於自己既寧靜，屬於自己既空間。而另一個自私問題呢，實情一係我就要佔有全部，無把握攞足120％寧願唔伸手去攞。無法十足佔有會不安，不安感會令我覺得透唔到氣，一透唔到氣就會覺得有所束縛唔可以自由鍾意想點就點，最後逃亡。Sherry式自由，係要空間自由發揮，而唔係好似野馬係草地亂跑。


有時朋友叫我去蒲，除非有極度不能推卻原因外都好少去。人地喜愛夜蒲，我係認真害怕夜蒲。Believe it or not，我handle唔到一次過見咁多人，平時見多過五個人都已經會lost，仲叫我一次過見幾百人不如叫我去死。何況我咁細膽去都無料到，不如慳返留係屋企，又唔係性感尤物，唔通著條長裙去咩大佬，都係難為人姐。全世界玩得好high時，我會暗自係一角覺得無聊，覺得無意義好㗰時間，其實太清醒真係唔岩去蒲，情況又一如小學時期個outsider。直到今時今日，都仍然係同一個outsider，完全無變過。仲記得有一次無可避免地要去某君生日party，唔知點解地一落車就潛意識捉到朋友好實，佢見我未飲酒就已經好似就快暈低，不停搵逃生出口，於是快手開完酒就即刻帶我逃離現場。我上車後，只係講左一句：「好驚啊。」而佢好溫柔地講左句：「乖，無事啦。」到現時為止仲未識解釋點解自己會咁，但我的確係咁，或者仲細卦。


我知我需要學習勇敢，但無論點勇敢，都仍然會本能地怕。深明無論點細膽無用都好，一定要勇敢地搵一個願意一世隨時無條件救我既人，而當搵到一個咁樣既人時，我就咩都唔會再怕。即使面前有幾千萬敵軍，稍有差池，仍然會有一個人會係後面救我。只要我知有人會救我，就夠膽放手為所欲為。我相信，直至世界末日前，會搵到一個人，愛上我既為所欲為，係背後保護我，令我真正成為一個束縛不來的人馬座。我好自私，所謂勇敢去愛，不過係想搵人救自己。但無可否認既係，直到而家我仍然天真到認為自己會搵到一個人知道幾時要救我，或者當我想求救又唔敢大叫時，都會拖我返屋企。由我啦，我仲細。


－


今日好唔舒服，真係好唔舒服。又一次差啲係tube暈低，暈一暈後，理解能力與邏輯基本上無左九成。去左Saachi Gallery睇The Little Black Jacket，平時好似人肉維基百科，呢幾日只好做個無知港女。陰公，把聲嗲到余文樂都媾到，好辛苦，真係好辛苦。


其實我都唔知自己打緊乜。


楊麗珊，你真係無鬼用。

Cosmopolis其實真係好睇，唔好個個一見Robert Patterson就尖叫或黑面啦。

Barbican Rain room. okay, that's me. 

 Lily Allen. 好掛住Lily Allen.  但如V所講，過去已經過去。

俠女周迅。 

To Rome with love. 容後再說.