港式街燈晚餐情意結

話說早排病得好緊要，有賴朋友們照顧啦，足足做左兩個禮拜廢人，仲嘆過係屋企，但大前提係已經幾年未試過病成咁。屋企啊媽彩我都傻，由得我自生自滅，Flatmate話啊媽一定同我好熟，佢既做法完全係示範之作，因為人地一邊照顧我，我多數一路反抗。叫我食粥我要食意粉，叫我食意粉我又要食公仔通心粉，麻撚煩煩咁，所以由得我去死就岩。三餐一宿，有埋藥食，但其實係因為啲藥先病咁耐都好唔返，最後決定做返自己，唔食藥兩日就好返都話左架啦，有時我唔聽話係有我道理既。


病重時打電話返屋企，努力忍住唔咳，講一堆廢話進入扮無事mode，老豆明顯知我玩野。而一個禮拜後打返去已經為時已晚，基本上屋企已經開得海味鋪。啊媽一路講，一路話啊老豆有幾錫我，由於當時Margiela上腦，一路聽一路覺得.....其實我physically都無得救架啦，不如用花膠條數俾我買個正版Margiela Clutch.....精神傷害大過身體傷害，醫心靈創傷緊要啲啊。難得我會計數，條數應該好重要，靜默左幾分鐘啊媽問：「Skype斷左線咩？」我自言自語話：「嘩..花膠條數可以買到個Margiela酒紅Clutch唔洗買H&M版MMM啦，燕窩數可以買到Balenciaga啦...兩條數加埋咪夠買Tom Ford，最多咪無骨膠原唔會死既。花旗蔘，最多咪少啲中氣囉還掂我霸氣搭救，嘩仲可以買MiuMiu好靚啊....」啊媽話：「你個衰女，人地一番心血買俾你補身，你細個老豆儲錢俾你兩隻衰野去外國讀書自己邊捨得買黎食，而家特登去買成日掛住手袋，有無讀書架你究竟，真係無人性。」


我發覺，女人買起野上黎，有時真係好無人性。


情況就如男人咸片上腦，女人會適時手袋上腦。


曾經用手袋上腦theory同老豆解釋，讀時裝真係會搵到錢，再用case study令佢更practical地理解成個理論，當日我又屈佢張卡去YSL買化妝品，佢即刻好深刻地理解，讀fashion好搵過做iBanker。


我對食真係無咩要求，食唔死唔會中毒即可，但當然我經常挑戰人體極限試新菜，真係最恐怖係咖哩芒果雞肉飯、朱古力汁蘋果牛肩，真係好食架。老豆成日唔知帶我地去邊食好，當然最好都係留係屋企食啦，但有時佢想出去食飯時，唔知係咪上一輩都有無限loop情意結，黎黎去去都只會去三四間風雨不改。


我屋企飯堂有：尖東太平館、流浮山霸氣老闆娘、尖沙咀Marco's結他叔叔、九龍城茶記、廟街街口、義順牛奶公司以及西貢全記大細uncle。真係全部都有返咁上下輩份，睇住我同細佬兩隻野大，去親都會摸摸我地個頭話大個仔大個女啦。其實上一代人情味唔單止係食店有返咁上下歷史，而係上一輩真係食開一間就到世界末日都唔會轉。而人情味係當你忘情亂9咁叫時，佢地會幫你cut單，叫你：「叫咁多食鬼到哂咩你，食住先啦。」每次聽到我就會覺得佢地真係同我老豆好friend，加上每次食親都一定係好野，從來唔會失手。然後慢慢會發現，年輕一輩餐餐都要新餐廳，eat-pay-go，基本上唔會去下次，就算有下次，到門口時都會發覺：「咦，執左既？」無限新鮮感，但好難會記得某一種特定味道。


尖東太平館係我屋企慶祝飯堂，生日啊升中六啊都係太平館食瑞士汁牛河，佢隻瑞士汁唔知點解真係第二度食唔到。每次係第二間茶記食牛河都會諗同太平館有咩唔同，久而久之就無再係第二啲餐廳食牛河，情況就好似睇Radiohead，睇完神級表演後，其他，都只係浮雲。流浮山就食打冷啦，斑頭腩即係油泡石班腩、蜜糖雞翼、豉汁蟶子，霸氣惹味系列好食到癲。老闆娘極之豪爽，成日鬧我老豆叫咁多嘥料，基本上係完全唔聽我老豆講野自己落單，就住我地一家四口食到幾多就落幾多，就住當日有咩新鮮就俾咩我地食，永無失手。


廟街街口打冷無得輸啦唔講啦，義順就因為老豆睇唔過眼澳洲牛奶公司明明唔好食又咁牙擦，所以永遠都會去隔離義順食雙皮奶，老豆真係好有型。其實義順呢，真係好食啲又無咁趕既。九龍城茶記燒味真係天下無敵，但睇佢個勢三間鋪變兩間，兩間而家變一間都大限將至，所以就算佢加到五十幾蚊一個燒味飯，我地都去支持，希望唔好咁快執啦，唔想食大家樂啊大佬。西貢全記岩岩開時唔出名架，係後來TVB效應先要訂位。細個Sherry妹好鍾意食上湯龍蝦，大細uncle好錫我次次去親都俾隻最大既我，而我呢........真係夠膽自己食哂架，後尾大uncle因為某些事啦所以永遠唔可以落床，細uncle自己一個撐起三間鋪。而家我去食，都仲會揀最大隻俾我，可能細個食哂啲Quota啦，已經唔多鍾意食。但每次去，仍然會食哂全碟，uncle加油啦你上鏡真係幾靚仔，有啲似黃金寶。


尖咀Marco's係平安夜飯堂，除左一年我無返香港之外，已經連續食左五年平安夜聖誕餐。好食唔係特別好食，聖誕餐十年如一日，龍蝦湯明顯係金寶湯，一舊食左都唔覺眼既鵝肝，一塊唔太好食既angus steak，仲有一個心太軟。唔好食，但內裡好似芬蘭小木屋有啲好crappy既聖誕裝飾好溫暖，而且有個uncle永遠被忽視地係一角彈結他。佢知我有聽，走黎問我鍾意聽咩，我話何韻詩啦！仲記得當時岩岩分手，佢係我身邊自彈自唱「我找到了」，即刻真係眼濕濕，放心啦uncle，第時我搵到之後，帶埋老公仔女黎聽你唱歌啦，你要繼續唱，真係有人聽架雖然唔好聽。


而最緊要，都係同屋企人去食。


今個聖誕又去Marco's啦，記住訂位啊老豆。