與小孩上一節德育邏輯課

陪Macy到醫院覆診，

看著她的情況有點好轉，

也就答應帶她到另一位朋友所辦的孩子聚會。



一到場數個小孩企圖爬上車，

Gordon就把他們逐個抱入開蓬車廂，

看著孩子們穿著鞋子們一直在車座上跳，

不禁與Macy在旁怪叫嘩幾時變得咁偉大，

話說岩岩係車入面食酸沙gummy bear都俾人鬧。



另一班較年長的孩子則一直試圖奪取我手中的糖果，

反正整件事很混亂，

直至家長們把他們抓走。



有一個很愛我的小學六年級孩子走來，

顯然非常苦惱地問：

sherry姐姐...點解要反國民教育既？（節錄）



我跟她說：

那不單是國民教育喔，

那是“德育”與國民教育喔。



然後把她擁在懷裡坐在沙發上，

說：

首先，

人地唔鍾意係咪代表你就要唔鍾意先？



她回應：

咁多人唔鍾意，

唔係就係唔好架咩？



我說：

如果好多人話hello kitty好醜樣，

係咪就代表hello kitty好醜樣？



她說：

唔係，

我唔覺得hello kitty醜樣。



我說：

你之前見過hello kitty覺得佢唔醜樣，

咁而家人人都話德育及國民教育唔好，

但妹妹根本都唔知咩黎架喎，

你未見過hello kitty會唔會話hello kitty醜樣？



她說：

唔會。



接著說：

咁好啦，

德育係品德教育，

即係你要自己諗點樣成為一個好人，

又點樣做會成為一個壞人。



國民教育係教你自己國家既歷史同而家發生既事，

咁做一個中國人等唔等於做一個好人或者壞人？



她說：

唔等於。



我答：

咁你而家明唔明德育同國民教育點解唔應該一齊教未？



佢問：

唔明。



我話：

聖經堂還聖經堂，

上次姐姐咪話你知聖經只係故仔，

老師可以講故仔你聽，

你可以自己判斷係故仔中學到啲咩，

但佢嚇你唔跟故仔做人會落地獄就係唔岩，

因為唔可以因為怕落地獄去做一個好人，

而做好人唔等於一定會有好報上天堂，

老師唔可以話唔信教就係一個罪人。



而家道理一樣，

佢可以話你知中國人係點中國係點，

但唔可以逼你學做中國人就等於做一個有品德既人。



佢問：

咁咩叫洗腦啊姐姐？



我答：

未經過你自己坐低慢慢諗，

人地話你聽係事實既諗法就叫洗腦，

又唔同太陽係東邊升起有證據支持既，

洗腦係無證據支持但佢將件事當事實咁教，

就好似上次你咪一見到Macy姐姐就喊既？



佢答：

因為媽媽話Macy姐姐有絕症好快會死。



我話：

Macy姐姐係有血癌，

但血癌唔等於係絕症，

你都唔知咩係血癌就話Macy姐姐無得醫係咪好唔公平先？



佢答：

係啊，

Macy姐姐只係病左。



我再回應：

咁而家你對德育及國民教育科知道啲咩先？

我地唔可以只係睇報章新聞講某一小部分就認定呢科一定係洗腦架喎，

而一大班人不停話反洗腦逼你去反都係另一種洗腦。



唔可以只係用一兩份斷章取義教材就認定全件事係錯，

要睇第一手資料而且比較，

自己諗到底係有益定有害，

最後再決定支持定反對。



佢望住本notebook話：

咁即係要乖同做中國人唔同，

但又未可以肯定係唔係洗腦。



我話：

係啊，

而家只可以確定“德育與國民教育科”係邏輯上錯誤，

但事實上都仲未可以肯定係咪洗腦，

只係唔可以俾小朋友認為做一個中國人就等於係一個好人，

就等於教會學校將倫理同聖經堂擺埋一齊教，

係根本上個邏輯錯誤，

咁就會邏輯上會教壞小朋友啦。



佢話：

姐姐你好香啊，

點解你次次都咁香既？



我話：

等你大個女，

姐姐就教你噴香水啦。



佢話：

咁姐姐係唔係同Gordon哥哥好好朋友架？

好朋友點解會結婚既？

媽媽話Gordon哥哥同姐姐第時結婚既？



我話：

好朋友係唔會結婚既，

呢個我可以好肯定話你知。