2012年9月17日星期一
良知光復行動
話說前日例牌遲到,
即係明明約人三點,
hea到三點三先出門口,
帶少許罪惡感地落街搭全九龍城小妹唯一識搭而唔會搭/落錯車既1A,
點解要強調唔會搭/落錯車呢?
且說:
九月四日 下午三點 太子地鐵站 晴
Sher(無奈mode):呀琪…我講樣野你聽,但你唔可以笑我on9架喎…
琪(平常mode):你又搭錯車啊?
Sher:我係九龍塘搭錯對頭地鐵,而家係太子…
琪:妖on9我都估到架啦,幾點到油麻地啊?
另一則:
Sher(真心遲到mode):errrrrr....sor啊…我搭錯車。
Fiona:…九龍城去九龍塘都搭錯車?!
Sher:咁呢我要搭25M嘛,我睇錯左搭左17M,原來法國醫院有兩架M........
Fiona:不如你認真去換左副眼鏡啦好無?乖啦。
然後又引另一位朋友:
唔好賴眼鏡啦,
你根本都無帶腦出街。
如果世界無1A的話,
此女子將會自我毀滅或者被進化論自然淘汰。
-
入返正題,
話說真係趕時間,
1A王子殺到拯救遲到的sherry,
王子多數都日理萬機架啦,
人都未上哂就快手閂門夾住個啊伯,
咁啊伯坐係門口唔肯郁大叫報警,
其實我覺得夾親無問題唔小心姐,
誠誠心心say個sorry咪得囉。
啊黑超巴士司機竟然話:
起身啦啊伯唔好阻住開車。
呢下真係無名火起,
當然有返啲教養唔出聲問候佢全家,
又見全車人不為所動聽歌既聽歌食花生既食花生,
就聯同隔離個男人去扶起佢。
啊伯死都唔肯起身,
原來個男人係醫生黎既就幫佢檢查下有冇事,
啊司機先生大聲夾惡話:
你邊隻眼見到我特登夾你啊?
睇唔到唔俾啊?
幾廿歲人就唔好搞咁多野啦。
然後一枚氣質才女發火:
喂大佬而家係你夾親人,
有冇心都好點講都係你唔岩啦下嘛,
仲坐係度大少爺好似唔關你事咁啊伯欠左你啊?
你落車行過黎扶起啊伯say聲sorry咪咩事都無囉,
打份工姐假假地都要做下樣啦先生又唔係叫你跪低認錯,
幾廿歲人唔係要個廿歲妹妹教你小學生常識下嘛,
洗唔洗我過黎幫你開門請你過黎道歉啊?
司機坐定定話:報警囉。
後面啲人話:啊伯起身啦,趕時間啊。
唔知香港人係咪有必要仆街成咁,
實情件事係唔需要報警,
但我見到個司機咁既態度實在覺得好不安有需要報警,
法官應該判佢去幼稚園再接受品德教育。
如果光復釣魚台前先要光復上水,
光復上水前,
係要先光復香港人應有既良知,
難怪立會選舉民建聯仲係會大勝,
無恥無知之徒仍然佔社會大多數。
唔好講中國未開戰先內戰先,
幾千年歷史中國人都係愛打自己人而非槍口對外架啦,
要提國恥之先,
先要逃避港恥呢回事。
香港人要逞強處理大是大非前,
唔該先處理好生活中小事小幹。
香港實情都非常危險。
-
話說我食哂全港所有茄子,
老豆逼我親自上山四十幾度做採瓜小姑娘,
採完第二日,
頂轉秋天有風既大佬。
-
我堅持sherry yeung係一個才女,
你地班凡夫俗子唔明架啦。
-
食斑頭腩呢回事實在非常邪惡,
就算即時懊惱去元朗B仔涼粉告解都於事無補,
去完流浮山食海鮮第二日,
望住臉上面近乎毀容既暗瘡,
真係輕嘆一句何必搵命搏呢。
-
去流浮山時經過屯門,
Fiona即刻話:嘩童年回憶啊。
記得細個細佬發脾氣整斷蠟筆,
我水佢支筆有生命做咩殺左佢,
結果佢望住兩截蠟筆喊左一晚。
又記得細個啊媽發海蔘,
我帶細佬入廚房呃佢話乾貨浸水會復活,
佢就一直以為海蔘、鮑魚、冬菇浸一陣會識游水。
然後我地係車上面聽903,
有個五年級小妹妹話要點隻戀無可戀俾啊哥,
最鍾意句歌詞係:
“說地談天的知己 變身枕畔的你”
佢認為隻歌講友誼萬歲。
Fiona話:
希望佢一世都唔會明隻歌講咩啦。
訂閱:
發佈留言 (Atom)
沒有留言:
發佈留言