末日前最後一個良夏

收拾時找到一件珍寶。


話說當年十六歲，
下午六時正紅雨交加，
老豆飛的返屋企仍然全身濕透，
我懶懶閒攤係梳化指揮佢去拎毛巾，
但佢突然係袋拎野出黎：





我當時反應係呆一呆，
啊媽講左句：你當個女三歲咩。


大前提係老豆好少買野俾我，
因為我由細開始已經非常獨立自主（勺蠻任性）。


事出必有因，
問問老豆，
佢話：
個的士佬紅雨都要開工養家，
佢問我買唔買啲野送俾個女，
我咪是但幫佢買樣幫補佢個女囉。


然後臉紅，
話：er...你唔鍾意咪俾表妹囉。
講完隨即逃離現場入房沖涼。


當時唔知笑定喊好，
一黎佢覺得個女會將呢舊野放上頭，
二黎又覺得老豆好型好best of the best，
三黎，
咁我又真係鍾意星星、間條同綠色既，
無諗過三件事加埋會錯成咁姐。


當然我唔會放上頭，
但我一直放係櫃桶，
成為多年珍藏。


諗返起個暑假，
老豆都無咩幾可為煲劇煲到波都唔睇馬都唔賭，
但見佢晚晚返屋企追蘇基笑到成個小學雞咁，
又唔知佢係咪少少共鳴啦，
話說我老豆都貪靚貪到名震天下。


又話說前日利物浦對曼聯，
死獌狗又踢4424，
我決定同老豆絕交收起哂所有雪條，
同時決定阻止佢繼續不停狂食月餅。


注意，
係狂。


即係中秋都有耐未到，
我家一門三傑細佬呀媽老豆已經解決左：
一盒火腿月、兩盒白蓮蓉、一盒六個裝迷你月、一盒冰皮，
而家仲有一盒白蓮蓉，一盒黃蓮蓉待領、一盒冰皮，
咁食落去仲得掂既大佬。


講返轉頭，
巴不得媽媽講世界末日，
到底世界末日我最想做啲咩同邊個過？


開頭，
我真係有諗過不顧一切去搵某一個人，
好用力攬實佢親口講句我愛你。


後來清醒之後，
我想同屋企人係屋企煲劇睇波食月餅。


我諗老豆係會收工後，
蒲到去街市慣常打電話返屋企問呀媽想食咩，
買完野食返屋企，
睇電視、俾呀女鬧、俾呀仔串、俾呀媽笑。


一個男人每日放工之後，
打俾你問你今晚想食咩，
幾十年黎風雨不改直至世界末日，
仲有咩好埋怨好要求？
要求高之餘，
要珍惜自己所有。


一如往常，
已是最好，
幸福如此，
其實已無所求。


錢財名利身外物，
我第時都會好努力搵錢，
我都有自己理想，
但追求名利之餘，
不可忘懷平凡小幸福。


幸福在於可以放工後，
一家人開開心心睇電視食牛腩，
老豆話齋：
夠就得啦，
唔需要多。


呀媽問：
你想搵個點既老公？
我答：
好似老豆咁就得。


世界末日？
屋企，小康，但快樂，
朋友，不多，但足夠，
學識，不深，也不淺，
理想，我有，追求過，
快樂，我有，剛剛好，
愛情，愛過，沒遺憾。


只是還未看完紅樓夢，
末日前會先跳到結局，
悟空學會失去後，
方能在天上回憶堡壘中快樂重聚。


必要記得，
學會失去，
前提為先盡力去做，
接著的隨遇而安，
得也好失也好，
總能得到飽滿心靈一個。


無所求，
更自由。


不執著不勉強，
方能成就快樂。


再見，
我的良夏。