我都話我喊唔出架啦

睇完《被偷走的那五年》，

結論係...

喊唔出。



有啲興趣想知睇套戲既年齡層，

當然我知套戲係打細路至三十樓下市場，

其實如果類似戲中白百何working lady去睇的話，

例如係黃迪詩，

一定喊唔出，

仲會講：

你睇就覺得好有型好浪漫，但你試下做女人啊，一啲都唔好玩。



可能我由細到大就有類似問題，

每隔一個月就會俾人話我掛住做自己野唔理人，

所以真係唔覺得感動，

只係覺得好煩。



睇落正路黎計應該會話起初係白百何唔岩，

太強勢串串貢掛住做野又唔肯低頭，

但well，

唔洗做啊？



真係好似流星花園you name a few啊？

個個富二代成世人流流長只係拍拖拍拖拍拖就有飯食啊？



hello，

你試下白百何叫張孝全唔好掛住做野唔好咁強勢blah blah blah，

試下白百何真係好似安心亞咁晚晚痴痴貢餵你食豆腐花啊，

睇下結果會係點？



結果咪係個女人好痴身好麻煩，

阻住地球轉，

最後？

咪又係離婚。



－



珍惜愛人係重要，

白百何知道失憶前所有事後會好傷心覺得自己好孤獨純粹非常正路，

只因為當初佢從一開始未失憶前都已經非常寂寞，

有咩比起自己一直努力，

但俾自己最愛人遺棄，

出去同人曖曖昧昧恐怖？



知道左之後，

你認為一個強勢、理性既女人應該要點？

打你十四巴唔夠理性，

喊住求你唔夠強勢，

咪只有轉移視線搵其他依賴。



當初佢如果唔係咁做的話，

點做creative director?



我覺得未至於要為自己強勢道歉，

因為張孝全扭計又唔直接扭，

搞埋啲小動作搞到白百何精神緊張，

基本上強勢 -> 忽略 -> 覺得被忽略 -> 扭計 -> 更加強勢 -> 更加忽略 -> ...... 係一個不能改變既循環，

我立場黎計，

做野已經咁撚辛苦，

仲要搞咁多野，

仲要係最忌既搞搞震，

逼到個老婆搵心理醫生，

你想個老婆點樣對你溫柔？



當然白百何依賴心理醫生，

同心理醫生上床係錯。



如果（假設）會逼到白百何去搵依賴的話，

其實張孝全都應該係好忙，

我又唔多見白百何有投訴。


－



由套戲開始第一秒，

白百何非常任性要控制自己人生所有事，

完全唔理人感受亦唔理人點諗，

基本上張孝全只可以捱打同跟住白百何個flow做野，

就連自己生命存亡都要任性地自己決定，

無諗過張孝全其實對佢既愛足以照顧佢一世，

仍然選擇賭一鋪，

我唔覺係偉大為對方諗，

因為佢無同對方討論過就落決定，

100個百分比中有90％成份係任性。



到最後，

逼到張孝全要徹底失去白百何，

其實，

都係源自於白百何任性。



最後一刻，

張孝全都係跟住白百何個flow做野，

白百何都係非常任性。



－



都係果句啦：

公主王子，

唔洗做咩？



唉，

我都話我好冷血，

真係喊唔出架啦。



P.S.

我睇左《愛．慕》。