岩岩睇完About Time，
戲中倫敦部分係我曾經幻想中出現過既情節，
只係我無男主角返轉頭改寫歷史能力。
然後一直諗如果有機會返轉頭再重新做決定、選擇的話，
有啲咩想改變或者重新再做多次？
出奇地好多好多好多事彈出黎，
始料不及地多，
唔諗都唔發現自己原來咁多野後悔，
哎呀如果當初唔係咁就好，
如果當初可以咁就好，
如果當日無去就好，
如果，
如果，
如果.....
結論係，
諗完一輪，
無一件事會改變到。
－
如果可以改變又點？
每次做野之前都知道自己可以返轉頭再做一次，
好難會盡力去做，
以我每次都太盡力做得太多既性格，
未必係好事。
記返起細個唔記得中幾時，
文學定中文堂要寫一篇文題為「如果…」，
我將篇文定名為「如果沒有如果」。
－
可以的話，
其實我只會希望我未來唔會做同一件錯事或者同一個錯誤決定，
事實上我人生都係不停地重複又重複某些曾經犯過既錯，
未必係對與錯問題，
只係唔適合係某一個世代某一段時間去做，
而我夾硬黎。
曾經有人話我夾硬黎逼自己活得好唔痛快，
錯，
就係因為我夾硬黎，
所以我人生過得非常痛快，
會話我夾硬做啲唔適合自己做野既人只係唔太了解我，
因為我永遠係了解左自己知自己想點先會夾硬黎，
而我會夾硬黎，
多數夾硬到做到為止
無論過程有幾痛苦。
或者暗地裡自己唔係希望未來唔再做同一樣既決定，
而係有經驗有定心理準備知道會有幾痛苦，
再去送死時要更加硬頸比較輕巧地去做，
上次做過都未死得，
下次都一樣唔會死，
但至少，
做緊自己真係想做既事。
只係要愚蠢地用十倍力量去做。
我知太硬頸唔係好事，
太任性亦都唔會係好事，
但俾我夾硬黎做到時，
我知我將會非常快樂。
－
上個禮拜朋友問三年大學學到啲咩？
…
無啊。
學到自己無咩朋友，
學到自己一個人生活唔會死，
學到戀愛失戀戀愛失戀同戀愛然後失戀，
學到就算仆街都要仆得靚，
學到自己好蠢成日俾人搵笨，
學到四十一號腳就唔好學人著高踭鞋，
學到自己無料就唔好扮四條，
學到扮四條之前要google同睇書，
學到自己原來睇得太多書所以無出息，
學到自己其實好安靜唔鍾意講野，
學到自己英文真係好差要返幼稚園再教育。
學到自己就係自己最好朋友，
學到自己一個生活非常自由，
學到失戀戀愛失戀戀愛失戀之後仍然要繼續戀愛，
學到點樣仆街可以有型地企返起身，
學到俾人搵笨之後都要繼續相信人，
學到四十一號腳可以買到減價斷碼鞋，
學到自己無料所以唔洗扮四條，
學到就算被逼要扮四條要令自己真係變四條，
學到睇書係自己興趣，
學到只有遇到好朋友自己就自然會想講野，
學到自己中文真係幾好。
學到討厭自己，
接受自己，
然後與自己好好相處。
－
新年時去左Southbank倒數，
Southbank絕對係我二十二年人生中其中一個最重要既地方，
每次有啲咩開心唔開心都一定會去Southbank，
由Waterloo行去London Bridge，
再由London Bridge向Tate Modern方向行到腳斷為止，
最後由Tate Modern對外Millennium Bridge千禧橋行過泰晤士河另一面搭Tube返屋企，
突然轉眼就行左四年。
新年當日好逼有廿幾萬人係同一個位置，
唔係用自己對腳行係完全俾人推向前，
睇煙花時即時非常倫敦地落好大雨好凍，
街上全地都係啤酒玻璃，
有人打交但警察只係負責遊人問路，
沿路封路突然發現幾幢樓好靚，
行經Covent Garden時有人唱All you need is love，
返屋企搭tube架車照常係中段停駛唔郁時隔離一班人大聲唱歌，
然後全個車卡點歌開party。
返到屋企之後，
我諗，
呢啲係唔係就係我想要既生活？
相比起香港居住與政治環境，
係。
但無論外在如何熱鬧溫暖，
歸根究底，
係英國其實好孤獨。
沒有留言:
發佈留言