雨水一盒

陳綺貞就快出碟，

兩隻單曲已經loop到倒轉識背，

琴晚發夢聽到「雨水一盒」其中一段：

「我感覺自己 完全的不可靠

我是我猜我會 慢慢瘋掉 最好不要」。



Final year頭兩個月，

主要覺得自己好廢，

本身個人已經好無安全感，

而家係十倍加強地無安全感。



感覺自己完全唔可靠，

當然個course係有問題，

但我本人都有大量問題，

好想逃避但逃避唔到，

好想逼自己又逼唔到，

應該好快就會痴線。



－


上兩個禮拜交完份好無安全感既功課後，

留左係屋企幾日，

然後忍唔住好想出街吹下風，

行去Westfield期間打返屋企，

結果係商場外同啊媽傾左兩個鐘頭電話。



當啊媽講「哎喲我以為你會返黎過聖誕添」既時候，

真係好想喊。


－


基本上已經習慣一個人生活，

每次想返屋企時多數都唔係因為痴家，

而係因為有野想逃避。



幾年來領悟到最佳逃難方法，

一定係走走走同埋離開，

當屋企有好多事發生時，

我又會好想返英國。



講到尾目的只有一個就係要逃避，

係死線壓頂逼住要面對之前，

心口只會掛住「唔好搞我」四個字，

由心而發地無勇氣面對一切，

但奇怪地又有勇氣逃避一切。



前年聖誕係房喊住過聖誕決定下年一定要返香港，

上年聖誕望住個iPhone喊住返香港，

上年暑假又係逃難式返香港，

基本上，

我係一個非常鍾意逃避既人，

香港有事返英國，

英國有事返香港，

逃避逃避逃避逃避到無得再逃避，

逃避到要面對，

面對完後，

又逃避。



今次好似好左啲，

雖然都係有逃避傾向，

至少今次知道仆街後要及早治療，

慳返段逃避時間其實（好似）可以做到好多野，

我唔知呢啲係咪叫做進步，

但叫做比較有建設性。



好似係。


－


係咪每個人year 3都唔知自己做緊咩同想做啲咩？

我第一年都仲知自己做緊咩，

但而家真係完全唔知自己做緊咩，

或者其實我知自己想做咩，

理想中都有好多野想做，

但係大學真係咩都做唔到。



可能我唔應該太認真地看待大學呢回事，

其實都只不過係guideline寫啲咩就跟住做啲咩，

唔好做多唔好做少岩岩好就夠，

anyway，

我都想自己係超級天才可以quit u離開呢個咁荒謬既地方，

但我唔係，

所以都係無得逃避。